მეცნიერებაში, კერძოდ კი ორნითოლოგიაში, მორიგ გარღვევად ახალი კვლევა მოგვევლინა. მკვლევრებმა დაასკვნეს, რომ მასტურბაცია ჩიტებს არა მხოლოდ ტყვეობაში, ბუნებრივ გარემოშიც ახასიათებთ, ამდენად, ეს მათთვის ჩვეული ქცევაა. მეტიც, კვლევა მიუთითებს, რომ ფრინველები ველურ გარემოში უფრო მეტად მასტურბირებენ, ვიდრე გალიაში. ამიტომ, ავტორები ახლა ვეტერინარებს მოუწოდებენ, ჩიტების მეპატრონეები დაარწმუნონ, რომ ამგვარ ქცევას არანაირი ზიანი არ მოაქვს და არც არანაირი ჩარევაა არაა საჭირო — არც ქირურგიული და არც ჰორმონალური მკურნალობის მეთოდები.

"ჩვენი მთავარი მიგნება ის გახლავთ, რომ მასტურბაცია ჩიტებისთვის ტყვეობაზე საპასუხო რეაქცია არაა", — აცხადებს ლანკაშირის უნივერსიტეტში ევოლუციური ეკოლოგიის პროფესორი, ქლოი ჰეიზი, — "ეს ფრინველებში საკმაოდ გავრცელებული ჩვევაა, ამდენად, მათი სექსუალური ქცევის სავსებით ნორმალური და ჯანსაღი ნაწილია. თავადაც მყავდა თუთიყუში, რომელიც სულ მასტურბირებდა. და თუკი გინახავთ ჩიტი, რომელიც მასტურბირებს, ზუსტად მიხვდებით, რასაც აკეთებს".

მკვლევრების ჯგუფმა ფრინველების ექსპერტებთან ერთად, ჩიტების პატრონები და მომშენებლები გამოკითხა, მიღებული პასუხები კი სამეცნიერო ლიტერატურასთან ერთად დააჯამა და საბოლოოდ 120 სახეობაზე შეაგროვა მონაცემები. როგორც ირკვევა, მასტურბაცია გავრცელებული ქცევაა თუთიყუშებში, იხვებში, ინდაურებსა და ქათმებშიც კი. აღრიცხულ შემთხვევებში ჭარბობენ მამრი ინდივიდები.

პროფესორ ჰეიზის თქმით, წინათ თავიანთი ჩიტების მასტურბირებით შეშფოთებული პატრონები ვეტერინარებს აკითხავდნენ, რის პასუხადაც ეს უკანასკნელები სხვადასხვა ზომას მიმართავდნენ, მათ შორის, მედიკამენტოზურ ჩარევას და სტერილიზაციასაც კი. ქცევის აღსაკვეთად, ფრინველების მეპატრონეებს ხშირად ურჩევდნენ მათ დასჯასაც.

ახალი კვლევის მნიშვნელობას კი სხვა მეცნიერებიც ხაზს უსვამენ. მათი აზრით, ეს სამეცნიერო ლიტერატურაში კიდევ ერთი მტკიცებულებაა, რომ ცხოველთა სამეფოში სექსუალურ ქცევას მხოლოდ რეპროდუქციული დანიშნულება არ აქვს.