პოლიტიკური ინიციატივა "ჯერ საქართველო" დამფუძნებლები ეროვნული უსაფრთხოების საკითხებზე სამსჯელოდ თანამოაზრეებთან საჯარო შეხვედრებს იწყებენ. ორგანიზაციის წარმომადგენელთა განცხადებით, ქვეყნის წინაშე არსებული გეოპოლიტიკური გამოწვევები უსაფრთხოების მოქმედი მიდგომების გადახედვას მოითხოვს.

"საქართველოს აღარ აქვს დრო, იცხოვროს 2011 წლის მოძველებული კონცეფციით. რუსეთის აგრესიული რევანშიზმისა და გლობალური წესრიგის რღვევის პირობებში, უმოქმედობა გვაქცევს გეოპოლიტიკურ "ნაპრალზე" მყოფ მოწყვლად სახელმწიფოდ", — აცხადებენ "ჯერ საქართველოში".

ინიციატივის ფარგლებში დაგეგმილი საჯარო დისკუსიების ძირითადი მიზნებია:

შეიქმნას უსაფრთხოების ისეთი სისტემა, რომელიც უპასუხებს თანამედროვეობის გამოწვევებს; უსაფრთხოების პოლიტიკა არ უნდა იყოს მხოლოდ ვიწრო ელიტის საქმე; ეროვნული უსაფრთხოება უნდა იყოს ეროვნული კონსენსუსის შედეგი.

საჯარო შეხვედრებზე გამართულ დისკუსიებს ვიქტორ ყიფიანი, გიორგი ანთაძე და გენერალ-მაიორი ვახტანგ კაპანაძე გაუძღვებიან.