"დღეს საია იწყებს დავას იმ მნიშვნელოვანი გამოწვევის საპასუხოდ, რომელიც ბავშვის უფლებებზე სამოქალაქო საქმეზე გაჭიანურებულ სამართალწარმოებას შეეხება," — წერს საქართველოს ახალგაზრდა იურისტთა ასოციაცია (საია) სოციალურ ქსელში ბავშვთა დაცვის საერთაშორისო დღესთან დაკავშირებით და დიუშენის კუნთოვანი დისტროფიის მქონე ბავშვებსა და მათ ოჯახებს სოლიდარობას უცხადებს.

ორგანიზაციის ინფორმაციით, საკონსტიტუციო სასამართლოში გასაჩივრებულია სამოქალაქო საპროცესო კოდექსის ნორმა, რომელიც საქმის ზემდგომ ინსტანციაში გასაჩივრების ან გადაწყვეტილების კანონიერ ძალაში შესვლის 14-დღიანი ვადის ათვლას მხარისთვის დასაბუთებული გადაწყვეტილების ჩაბარებას უკავშირებს. საიას განცხადებით, ერთ-ერთ არასრულწლოვანს, რომლის ინტერესებსაც ორგანიზაცია იცავს, სასამართლოს დასაბუთებული გადაწყვეტილება უკვე დაახლოებით 2,5 წელია არ ჩაბარებია, რაც მას საკუთარი უფლებების შემდგომ ინსტანციაში დაცვის შესაძლებლობას უზღუდავს.

"დღეს, 1 ივნისია, ბავშვთა დაცვის საერთაშორისო დღე, რომელიც კიდევ ერთხელ გვახსენებს, რომ ყველა ბავშვი იმსახურებს ღირსეულ ცხოვრებას, ხარისხიან ჯანდაცვასა და ზრუნვას. დღევანდელ დღეს, პირველ რიგში, კვლავ სოლიდარობას ვუცხადებთ დიუშენის კუნთოვანი დისტროფიის მქონე ბავშვებსა და მათ ოჯახებს, რომლებიც ყოველდღიურად იბრძვიან არა მხოლოდ დაავადებასთან, არამედ აუცილებელ სამედიცინო მომსახურებასა და მკურნალობაზე ხელმისაწვდომობისთვის.

დღეს საია იწყებს დავას იმ მნიშვნელოვანი გამოწვევის საპასუხოდ, რომელიც ბავშვის უფლებებზე სამოქალაქო საქმეზე გაჭიანურებულ სამართალწარმოებას შეეხება. საიამ საკონსტიტუციო სასამართლოს მიმართა და სადავოდ გახადა სამოქალაქო საპროცესო კოდექსის ის ნორმა, რომელიც საქმის ზემდგომ ინსტანციაში გასაჩივრების ან გადაწყვეტილების კანონიერ ძალაში შესვლის 14-დღიანი ვადის ათვლას მხარისთვის დასაბუთებული გადაწყვეტილების ჩაბარებას უკავშირებს.

არასრულწლოვანს, რომლის ინტერესებსაც საია იცავს, სასამართლოს დასაბუთებული გადაწყვეტილება დაახლოებით 2.5 წელია არ ჩაბარებია, მიუხედავად იმისა, რომ მოსამართლე ხათუნა ჯინორიას მის მოსამზადებლად 14-დღიანი ვადა ჰქონდა. ამის გამო, მოსარჩელეს ხელი ეშლება საკუთარი უფლებების შემდგომ ინსტანციაში დაცვაში, მაშინ, როდესაც მისი საქმე იშვიათი დაავადების, ფენილკეტონურიის , საკითხს უკავშირდება," — წერია განცხადებაში.

ცნობისთვის, დღეს, 1 ივნისს, ბავშვთა დაცვის საერთაშორისო დღეა.