შინაგან საქმეთა სამინისტროში სიძულვილის ენის წინააღმდეგ ბრძოლის ახლად შექმნილი სამმართველოს ამოქმედებას პარლამენტის ადამიანის უფლებათა დაცვის კომიტეტის თავმჯდომარე, რატი იონათამიშვილი გამოეხმაურა.

იონათამიშვილის განცხადებით, სამმართველოს შექმნის შესახებ გადაწყვეტილების გამოცხადების შემდეგ მკაფიოდ გამოჩნდა იმ ჯგუფებისა და პირების დამოკიდებულება, რომლებიც, მისი შეფასებით, სიძულვილის ენას ყოველდღიურად მიმართავენ.

"მას შემდეგ, რაც სიძულვილის ენის წინააღმდეგ ბრძოლის სამმართველოს შექმნა დაანონსდა, ვნახეთ, რადიკალურ ჯგუფებს და იმ ადამიანებს რა რეაქცია ჰქონდათ, რომლებმაც ზიზღი და სიძულვილის ენა ყოველდღიური საქმიანობის ნიშნად აქციეს," — განაცხადა იონათამიშვილმა (კომენტარს "პირველი არხი" ავრცელებს).

მისივე თქმით, სიძულვილის ენის გამოყენება დემოკრატიული ღირებულებების უარყოფას და ძალადობრივი მიდგომების წახალისებას ნიშნავს.

"ის, ვინც სიძულვილის ენას ირჩევს, რა თქმა უნდა, სინამდვილეში ოპონირებისას ამჯობინებს ზიზღს, ძალადობას და უარს ამბობს დემოკრატიულ პრინციპებსა და ღირებულებებზე," —აღნიშნა პარლამენტის ადამიანის უფლებათა დაცვის კომიტეტის თავმჯდომარემ.

რატი იონათამიშვილის შეფასებით, ახალი სამმართველოს საქმიანობა მნიშვნელოვანი იქნება როგორც დემოკრატიული გარემოს გაძლიერებისა მომავალი თაობების ინტერესების დასაცავად.

"ჩვენი ვალდებულებაა, ქართული პოლიტიკური სივრცე სიძულვილის ენისგან გავწმინდოთ. დარწმუნებული ვარ, სამმართველო ამ საქმიანობის მიმართულებით წარმატებული იქნება, რადგან ეს სჭირდება მომავალ თაობებს და დემოკრატიული ღირებულებების განვითარებას," — განაცხადა მან.

ცნობისთვის, სიძულვილის ენის წინააღმდეგ ბრძოლის ახლად შექმნილი სამმართველო ფუნქციონირებას დღეიდან, 1-ელი ივნისიდან შეუდგა. სამმართველოს თანამშრომელთა რაოდენობა ათი საშტატო ერთეულით განისაზღვრა.

უწყების ცნობით, სამმართველოს ძირითადი ფუნქცია-მოვალეობები ადამიანის ღირსების შემლახველი-შეურაცხმყოფელი და სიძულვილის ენის შემცველი საჯაროდ გავრცელებული იმგვარი განცხადებების მონიტორინგი და პროაქტიული გამოვლენა იქნება, რომელიც შეიცავს საქართველოს ადმინისტრაციულ სამართალდარღვევათა კოდექსით გათვალისწინებულ სამართალდარღვევის ნიშნებს.