ჯაშუშობის ბრალდებით დაკავებულ გულბაათ რცხილაძეს აღკვეთის ღონისძიების სახით პატიმრობა შეეფარდა. გადაწყვეტილება თბილისის საქალაქო სასამართლოს მოსამართლემ ლელა მარიდაშვილმა მიიღო.

დაცვის მხარემ სასამართლოს პატომრობის ალტერნატივის სახით 30 000- ლარიანი გირაო შესთავაზა, თუმცა პროკურატურა ყველაზე მკაცრი აღკვეთის ღონისძიების — პატიმრობის შეფარდებას ითხოვდა.

შეგახსენებთ, სახელმწიფო უსაფრთხოების სამსახურმა 30 მაისს, საქართველოს ინტერესების საზიანოდ ჯაშუშობისთვის გულბაათ რცხილაძე დააკავა. 30 მაისს, იმავე ბრალდებით დააკავეს ჟურნალისტი ირაკლი ჩიხლაძეც.

ცნობისთვის, გულბაათ რცხილაძე ერთ-ერთია, ვისი მეთაურობითაც ცოტა ხნის წინ საქართველოში რუსოფობიის მონიტორინგის საბჭო შეიქმნა. ამას გარდა ის პრორუსული ორგანიზაცია ევრაზიის ინსტიტუტის დირექტორია.

"აი, ფაქტის" ცნობით, გულბაათ რცხილაძის ორგანიზაციას, 2020 წლიდან აფინანსებს აშშ-ს მიერ დასანქცირებული რუსული "პრავფონდი", რომელიც საქართველოში 2013 წლიდან მუშაობს. მათივე ცნობით, გულბაათ რცხილაძეს საქართველოში რეგისტრირებული აქვს ოთხი ორგანიზაცია: "ევრაზიის ინსტიტუტი", "კავკასიური თანამშრომლობა", "სახალხო მოძრაობა ქართულ-რუსული დიალოგისა და თანამშრომლობისთვის" და "საქართველოს უკვდავი ჯარი".

გულბაათ რცხილაძე სხვადასხვა დროს ჩართული იყო ისეთი წიგნებისა და დოკუმენტური ფილმების მომზადებაში, რომლებიც უკრაინაში რუსეთის ომთან დაკავშირებით კრემლის ოფიციალურ პოზიციასა და გზავნილებს ასახავდა. ამასთანავე, რეგიონებში გამართულ შეხვედრებზე ის დასავლური ინსტიტუტების მისამართით კრიტიკული და ანტიდასავლური ხასიათის განცხადებებით გამოდიოდა.