იტალიის ხელისუფლებამ ქალაქ რეჯო-ემილიაში დაგეგმილი კანიე ვესტისა და ტრევის სკოტის კონცერტები გააუქმა. მიზეზად საზოგადოებრივი წესრიგის დარღვევა და უსაფრთხოებასთან დაკავშირებული რისკები დასახელდა. რეალურად, ეს გადაწყვეტილება მას შემდეგ მიიღეს, რაც ადგილობრივმა ებრაულმა თემმა კანიე ვესტის კონცერტის გაუქმება მოითხოვა.

საზოგადოების აღშფოთება კანიე ვესტის არაერთმა ანტისემიტურმა, რასისტულმა და პრონაცისტურმა განცხადებებმა გამოიწვია, რის გამოც მას ცოტა ხნის წინ დიდ ბრიტანეთში შესვლაც კი აუკრძალეს. ამის შემდეგ, მისი კონცერტები სხვა ქვეყნებშიც გაუქმდა — მარსელში დაგეგმილი ტურნეს ნაწილი "გაურკვეველი ვადით" გადაიდო, პოლონეთში დაგეგმილი კონცერტი კი "ფორმალური და სამართლებრივი მიზეზების გამო" გაუქმდა.

2022 წელს კანიე ვესტმა სოციალურ ქსელში დაწერა, რომ ებრაელების წინააღმდეგ "ომის რეჟიმს" გამოაცხადებდა. გასული წლის მაისში კი სიმღერა Heil Hitler გამოუშვა და სვასტიკიანი მაისურების გაყიდვაც დაიწყო.

საზოგადოების კრიტიკის შემდეგ, რეპერი შოუბიზნესის ყურადღების ცენტრში დაბრუნებას ცდილობს. მან ერთ-ერთ ჟურნალში გამოქვეყნებულ ვრცელ განცხადებაში თავისი საქციელის გამო ბოდიშიც კი მოიხადა. "მე არც ნაცისტი ვარ და არც ანტისემიტი. მე მიყვარს ებრაელი ხალხი", — წერდა ის.

Ye სცენაზე ტრევის სკოტთან და სხვა არტისტებთან ერთად უნდა გამოსულიყო, მათ შორის იყვნენ The Chainsmokers, რიტა ორა და Swedish House Mafia.

რაც შეეხება ტრევის სკოტს, ის საზოგადოების მკაცრი კრიტიკის ქარცეცხლში მას შემდეგ მოექცა, რაც 2021 წელს, ტეხასის შტატში, მომღერლის Astroworld ფესტივალზე ჭყლეტას 9-დან 27 წლამდე ასაკის 10 ადამიანი ემსხვერპლა, ათასობით სხვა ადამიანი კი დაშავდა. ამერიკელი რეპერის გამოსვლისას, ხალხი სცენას ერთიანად მიაწყდა, რამაც საშინელი პანიკა გამოიწვია და ათასობით ადამიანი დაშავდა.

ასევე იხილეთ: