სტატია შეიცავს სპოილერებს ახალ ფილმიდან Moss & Freud.

მოდის ინდუსტრიის ერთ-ერთ ყველაზე გავლენიან სუპერმოდელს, ქეით მოსს, კარიერის განმავლობაში პირად ცხოვრებაზე თითქმის არასდროს უსაუბრია. თუმცა, მოსისა და მხატვარ ლუსიან ფროიდის მეგობრობის ისტორია მაყურებელი ახალ ფილმში — Moss & Freud — იხილავს.

მას შემდეგ, რაც 80-იანი წლების ბოლოს, ლონდონის გარეუბნიდან მოსული მოზარდი მოდის სამყარომ აღმოაჩინა, ქეით მოსი უამრავი ჟურნალის გარეკანზე მოხვდა, ათასობით ჩვენებაზე გამოვიდა და მუდმივად მედიის ყურადღების ცენტრში იყო.

მიუხედავად მუდმივი პოპულარობისა, ფართო საზოგადოებამ ქეით მოსის შესახებ რეალურად ძალიან ცოტა რამ თუ იცის. ტაბლოიდური ისტორიების მიღმა, რომლებიც მას მხოლოდ სხვა ვარსკვლავებთან ერთად წვეულებების მოყვარულ გოგოდ ხატავდნენ, ქეითმა მოახერხა, რომ მისი პირადი ცხოვრება ერთგვარ გამოცანად დარჩენილიყო და ინტერვიუები თითქმის არასდროს მიუცია.

ავტობიოგრაფიული ფილმის, Moss & Freud-ის რეჟისორი და სცენარის ავტორი ოსკაროსანი ჯეიმს ლუკასია. სიუჟეტი 2000-იანების დასაწყისში ვითარდება. მთავარ როლს ელი ბამბერი ასრულებს, რომელიც საოცრად ჰგავს ქეით მოსს. ის ფროიდის წინაშე, რომლის როლსაც დერეკ იაკობი თამაშობს, შიშველი პოზირებს, ფილმი კი იმ უცნაურ მეგობრობას ასახავს, რომელიც მათ შორის ამ შემოქმედებითი პროცესის დროს დაიბადა.

ფილმი დეტალურად ასახავს, თუ როგორ ცხოვრობდა ქეით მოსი მაშინ, როცა პოპულარობის პიკს მიაღწია. ფილმის სიუჟეტიდან ვიგებთ, რომ ამ დროს ის საშინლად დაღლილი და გადამწვარი იყო.

გარდა ამისა, Moss & Freud-ში სუპერმოდელი ქეით მოსის შესახებ რამდენიმე სკანდალური და ემოციური დეტალი აშკარავდება. ფილმში ნაჩვენებია მოდელის მიერ კარიერის დასაწყისში გადატანილი მძიმე ემოციური ტრავმები, მათ შორის შემთხვევა, როდესაც 17 წლის ასაკში ფოტოსესიაზე იძულებით გააშიშვლეს. ფილმის ყველაზე სკანდალური მომენტი კი ცნობილ მხატვარ ლუსიან ფროიდთან ერთად, პორტრეტის ხატვის პროცესში, ოპიუმის მიღების სცენაა.

ქეით მოსის მონაწილეობა ფილმში

სცენარი რეჟისორ ჯეიმს ლუკასის მოგონილი სულაც არ არის. ქეით მოსი პროექტს თავად დასთანხმდა. რეჟისორი ჯეიმს ლუკასი ჰყვება, რომ მოდელს თავიდან ძველებური მეთოდით — ჩვეულებრივი, ფოსტით გაგზავნილი წერილით დაუკავშირდა.

"ეტყობა კინოს ღმერთები ჩემს მხარეს იყვნენ, რადგან ქეით მოსმა ძალიან სწრაფად მიპასუხა და მალევე საქმეს შევუდექით", — დასძინა ჯეიმს ლუკასმა.

რეჟისორის თქმით, წლების განმავლობაში სუპერმოდელი ყველა დოკუმენტურ თუ მხატვრულ ფილმზე უარს ამბობდა. ამჯერად კი არა მხოლოდ დათანხმდა, არამედ ფილმის აღმასრულებელი პროდიუსერიც გახდა. ქეითმა მისი როლის შემსრულებლის, ელი ბამბერის შერჩევაშიც კი მიიღო მონაწილეობა.

ფაქტი, რომ ქეით მოსი თავად არის ფილმის პროდიუსერი, უამრავ ეჭვს აჩენს. კრიტიკოსები თვლიან, რომ ფილმი მისი იმიჯის გამოსწორების მცდელობაა, თუმცა რეჟისორი ფილმის მიკერძოებულობას უარყოფს.