"ხელისუფლებას არ ადარდებს ბავშვები. ის ვერ უმკლავდება ბავშვთა სიღარიბეს, ოჯახების გახლეჩას და უმძიმეს დემოგრაფიულ კრიზისს" — წერს სამოქალაქო პლატფორმა "ერთი ხალხი — ერთი საქართველო" სოციალურ ქსელში ბავშვთა დაცვის საერთაშორისო დღესთან დაკავშირებით.

განცხადებაში პლატფორმა ყურადღებას ამახვილებს ბავშვთა სიღარიბეზე, განათლებასა და ჯანდაცვაზე ხელმისაწვდომობის პრობლემებზე, ემიგრაციის გავლენაზე ოჯახების მდგომარეობასა და დიუშენის სინდრომით დაავადებული ბავშვების საჭიროებებზე.

"ხელისუფლებას არ ადარდებს ბავშვები. ის ვერ უმკლავდება ბავშვთა სიღარიბეს, ოჯახების გახლეჩას და უმძიმეს დემოგრაფიულ კრიზისს.

ჩვენს ქვეყანაში ბავშვების 37.8% უკიდურეს სიღარიბეში იზრდება, ყოველი მეოთხე ბავშვი საბავშვო ბაღში არ დადის, ხოლო უკიდურეს სიღარიბეში მცხოვრები ბავშვების 45% სასკოლო საათებში არ იკვებება. დაახლოებით ყოველი მეხუთე ბავშვს სასკოლო საგნებში დამატებით უწევს მომზადება, რომ უმაღლესი განათლების შესაძლებლობა ჰქონდეს. ეს ნიშნავს, რომ ჩვენს ქვეყანაში ბავშვებს თანასწორი შესაძლებლობები არ აქვთ.

ქართული ოცნება ხლეჩს ოჯახებს, ბავშვებს მშობლების გარეშე ტოვებს. ბოლო ათ წელიწადში საქართველოდან დაახლოებით 244 000 მოქალაქე ემიგრაციაში წავიდა. დღეს სულ უფრო მეტი ოჯახი დგას მძიმე სოციალური და ეკონომიკური კრიზისის წინაშე. ოჯახები ტოვებენ ქვეყანას, რადგან საკუთარ ქვეყანაში შვილებისთვის ღირსეული მომავლის შექმნას ვეღარ ახერხებენ. ბავშვები კი მშობლების მონატრებაში იზრდებიან. დედები და მამები უცხო ქვეყანაში სხვის ოჯახებს უვლიან, მათი შვილები კი ამაოდ ელოდებიან მშობლის ჩახუტებას. შედეგად, დღეს ქართული ოჯახები დაუცველები არიან.

ის ოჯახები, ვინც საქართველოში რჩებიან, ხელისუფლების გულგრილობის მსხვერპლნი ხდებიან. მრავალი კვირის განმავლობაში, დიუშენის სინდრომით დაავადებული ბავშვების მშობლები საკუთარი შვილებისთვის აუცილებელ წამალს ითხოვენ. ისინი ათენებენ ღამეებს იმისთვის, რომ მათი თხოვნა შეისმინონ. ხელისუფლებას კი მათი არ ესმის.

საქართველოს მოქალაქეები ძლიერ ოჯახებს და დაცულ ბავშვებს ვიმსახურებთ. იმისთვის, რომ უკეთესი მომავალი და დაცული ქვეყანა ვიხილოთ, დღეს დემოგრაფიული პრობლემების მოგვარებაზე უნდა დავიწყოთ ფიქრი. ქვეყანა, რომელიც ბავშვებს კარგავს, მხოლოდ მოსახლეობას კი არა, საკუთარ მომავალსაც კარგავს.

ხელისუფლება ვალდებულია თითოეულ ბავშვს შეუქმნას ღირსეული ცხოვრების პირობები: ხელმისაწვდომი ჯანდაცვა, უსაფრთხო გარემო და ხარისხიანი განათლება.

1 ივნისს მსოფლიო ბავშვთა დაცვის საერთაშორისო დღეს აღნიშნავს. თუმცა, დღეს საქართველოში ეს თარიღი მხოლოდ სიმბოლური მილოცვის დღე არ უნდა იყოს. ეს უნდა იყოს ბავშვების რეალურ პრობლემებზე, საჭიროებებსა და უფლებებზე საუბრის დღე", — ნათქვამია განცხადებაში.

ცნობისთვის, დღეს, 1 ივნისს, ბავშვთა დაცვის საერთაშორისო დღეა.