მოსამართლემ ეკა ბარბაქაძემ ჯაშუშობის ბრალდებით დაკავებულ ირაკლი ჩიხლაძეს აღკვეთის ღონისძიების სახით პატიმრობა შეუფარდა. საქმეს გრიფით საიდუმლო ადევს და სხდომა დახურულ ფორმატში ჩატარდა.

სახელმწიფო უსაფრთხოების სამსახურმა 30 მაისს, საქართველოს ინტერესების საზიანოდ ჯაშუშობისთვის, ირაკლი ჩიხლაძე და გულბაათ რცხილაძე დააკავა. ჯერ-ჯერობით უცნობია დაკავშირებულია, თუ არა ჩიხლაძის და რცხილაძის საქმეები ერთმანეთთან. სუს-ის განცხადებით, რცხილაძე ორი ქვეყნის სასარგებლოს ჯაშუშობდა, ხოლო ჩიხლაძე — ერთი. განსხვავებით რცხილაძისგან, რომელსაც ბრალად რუსეთის და ირანის სასარგებლოდ ედება ბრალი, ჩიხლაძეზე ეს დეტალი უცნობია.

"პროკურორმა მოხსნას გრიფი "საიდუმლო" და მერე ყველა მასალაზე ვისაუბრებ რასაც ედავებიან ირაკლი ჩიხლაძეს," — განაცხადა რცხილაძის ადვოკატმა, გიორგი გელხაურმა.

ადვოკატის განმარტებით, მისი დაცვის ქვეშ მყოფი ამ ეტაპისთვის დუმილის უფლებით სარგებლობს. გელხაურმა ჟურნალისტებთან საუბრისას ასევე განაცხადა, რომ სასამართლო სხდომაზე ვერ მიიღო ინფორმაცია, თუ რის საფუძველზე ედავებიან ჩიხლაძეს.

"კითხვები დავსვი, რა საიდუმლო ინფორმაცია ან შემცველი დოკუმენტი მიაწოდა საკონტაქტო პირს, ეს მაინტერესებდა. ან ქვეყნის ინტერესების დაზიანება რაში გამოიხატებოდა? პასუხები ვერ მივიღე. არცერთი პუნქტი, რომლებსაც ითვალისწინებს სისხლის სამართლის კოდექსის 314-ე მუხლი — ჯაშუშობა არ დარღვეულა ირაკლი ჩიხლაძის მიერ, შესაბამისად ეს გადაწყვეტილება იყო დაუსაბუთებელი და უკანონო.

მე ვკითხე, ირაკლი, რა შეიძლება იყოს, რისთვისაც ისჯები, მაგრამ ის გაოგნებულია და არ იცის, ის სახელმწიფოს საზიანოდ არაფერს არ აკეთებდა და არც ახლა გაუკეთებია და მისთვის გაუგებარია რისთვის ისჯება," — თქვა ადვოკატმა.

ირაკლი ჩიხლაძის ძმა, ჟურნალისტი გიგა ჩიხლაძე 2008 წლის ომში მოკლეს. ირაკლი ჩიხლაძე პროფესიით ჟურნალისტი და "სამოქალაქო მოსმენების კავკასიური ცენტრის" დამფუძნებელი და ხელმძღვანელია. 30 მაისს სუს-ის ბრიფინგზე განაცხადეს, რომ ჩიხლაძე ონლაინ პლატფორმის საფარით "სხვადასხვა პირისგან შემდგარ სადაზვერვო ქსელს" მართავდა.