თბილისის მერიამ სიონის ტაძარში სარეაბილიტაციო სამუშაოები დაიწყო. მერიის ინფორმაციით, ამ ეტაპზე ტაძრის ირგვლივ სამშენებლო ხარაჩოების მოწყობა მიმდინარეობს.

არსებული მდგომარეობით, დაზიანებულია ტაძრის გადახურვა და სამრეკლო, რის გამოც ნალექი კედლებში აღწევს, აზიანებს მათ და საფრთხეს უქმნის ტაძარში არსებულ ფრესკებს. პროექტის ფარგლებში აღნიშნულ ნაწილებს სრული რეაბილიტაცია ჩაუტარდება.

თბილისის მერიის ცნობით, სიონის ტაძარი და მისი სამრეკლო კულტურული მემკვიდრეობის სტატუსის მქონე ძეგლებია, ამიტომ სარეაბილიტაციო სამუშაოებს თბილისის განვითარების ფონდი განახორციელებს.

მერიის ინფორმაციით, სამშენებლო სამუშაოები მიმდინარე წლის ოქტომბრის ბოლოს დასრულდება. პროექტის საერთო ღირებულება 1 220 000 ლარს შეადგენს.