29 წლის მსჯავრდებულ ნოდარ ტატუნაშვილის ოჯახის წევრები აცხადებენ, რომ კლინიკაში შეყვანიდან ერთი კვირის შემდეგ პაციენტი კომაში ჩავარდა და ამ დრომდე უგონო მდგომარეობაშია. 14 მაისს ტატუნაშვილი, შიმშილობის შედეგად განვითარებული ჯანმრთელობის პრობლემების გამო, პენიტენციური დაწესებულებიდან "ვივამედის" კლინიკაში გადაიყვანეს.

პატიმარი 60 დღეზე მეტია შიმშილობს — მისი მთავარი მოთხოვნა ბათუმის ციხის მკაცრი რეჟიმის დაწესებულებიდან თბილისის ნებისმიერ პენიტენციურ განყოფილებაში გადაყვანაა.

ახალგაზრდა კაცის ოჯახის წევრები ტვ პირველთან საუბრისას ამბობენ, რომ ტატუნაშვილის ჯანმრთელობის მდგომარეობის შესახებ კლინიკის პერსონალი მათ ინფორმაციას არ აწვდის და არასწორად მკურნალობდნენ.

"ვითხოვთ, გაგვარკვიონ, ცოცხალია თუ არა. რომ შემოიყვანეს, ყოველდღე აქ ვართ. ექიმს ვთხოვე, სახელი და გვარი ვუთხარი და ვთხოვე მისი ნახვა. როცა ექიმმა სახელი და გვარი გაიგო, ვერ იცნო ჩემი შვილი. რეაგირება არ ჰქონდა. გამოვიდა და მითხრა, გაბუტულია, არ მელაპარაკებაო, ახლა ასეთი პროტესტის ფორმა აქვსო. რას ნიშნავს ეს? (დიახ, ეს არის თამარ დავარაშვილი). უნდა გადაემოწმებინათ, ტვინში რა ხდება. ამათმა გამოკვლევები კი არ ჩაუტარეს, ანალიზებში რომ ჩაიხედოთ, იფიქრებთ, რომ ჯანმრთელია. არ ეკითხებიან ნოდარს არაფერს. შეჰყავთ 5%-იანი გლუკოზა. ქალბატონი თამარ დავარაშვილი მორიგეობას 5 საათზე ამთავრებს, მიდის და დაახლოებით 3–4 საათში პაციენტს ისეთი წნევა აქვს, რომ რეანიმაციაში უნდა გადაიყვანონ. გუშინდელი მონაცემებით, ძალიან მძიმედაა. გვითხრეს, რომ ღვიძლმა დაიწყო ორგანიზმის დაზიანება და ტვინში მძიმე მდგომარეობაა. ძალიან მძიმედაა," — ამბობს პატიმრის და "ტვ პირველთან" საუბრისას

დღეს, 1-ელ ივნისს, სპეციალურმა პენიტენციურმა სამსახურმა ნოდარ ტატუნაშვილთან დაკავშირებით განცხადება გაავრცელა. უწყების ცნობით, ტატუნაშვილი კლინიკაშიც შესაბამის მკურნალობაზე უარს აცხადებდა.

"მსჯავრდებულ ნოდარ ტატუნაშვილს განსაზღვრული ჰქონდა საშიშროების მაღალი რისკი და სასჯელს იხდიდა სპეციალური პენიტენციური სამსახურის №3 პენიტენციურ დაწესებულებაში.

მსჯავრდებულმა ნოდარ ტატუნაშვილმა 2026 წლის 1-ელი აპრილიდან დაიწყო შიმშილობა, უარს აცხადებდა საკვების მიღებაზე და იღებდა მხოლოდ სითხეს. საქართველოს კანონმდებლობის შესაბამისად, თუ პაციენტი გონებაზე იმყოფება, თავად განსაზღვრავს როგორც საკვების მიღების, ისე მკურნალობის ჩატარების საკითხს. მსჯავრდებული უარს აცხადებდა ლაბორატორიულ-ინსტრუმენტულ კვლევებზე და ვიტალური პარამეტრების კონტროლზე. აპრილში მას შესთავაზეს №18 ბრალდებულთა და მსჯავრდებულთა სამკურნალო დაწესებულებაში გადაყვანა, რაზეც უარი განაცხადა. სპეციალურმა პენიტენციურმა სამსახურმა მას არაერთხელ შესთავაზა სამოქალაქო სექტორის კლინიკაში გადაყვანა, რაზეც თავდაპირველად უარს აცხადებდა. საბოლოოდ, 2026 წლის 13 მაისს მსჯავრდებული დათანხმდა კლინიკაში გადაყვანას.

2026 წლის 14 მაისს ნოდარ ტატუნაშვილი შიმშილობის შედეგების მართვისა და სტაციონარული მეთვალყურეობის მიზნით სპეციალური პენიტენციური სამსახურის №3 პენიტენციური დაწესებულებიდან გადაყვანილ იქნა სამოქალაქო სექტორის კლინიკა "ვივამედში". მსჯავრდებული გადაადგილდებოდა დამოუკიდებლად და იყო კონტაქტური, თუმცა შიმშილობის გამო ფიზიკურად დასუსტებული. მიუხედავად არაერთგზის შეთავაზებისა, საკვების მიღებასა და სრულფასოვან მკურნალობაზე ნოდარ ტატუნაშვილი უარს აცხადებდა, რაც შესაბამისად შეუძლებელს ხდიდა ადეკვატური სამედიცინო მომსახურების სრულად მიწოდებას მისი ჯანმრთელობის მდგომარეობიდან გამომდინარე.

სპეციალური პენიტენციური სამსახური იმედს გამოთქვამს, რომ მსჯავრდებულ ნოდარ ტატუნაშვილის სიცოცხლესა და ჯანმრთელობას საფრთხე არ შეექმნება; იგი იმყოფება მაღალკვალიფიციური სამედიცინო პერსონალის მუდმივი მეთვალყურეობის ქვეშ," — ნათქვამია უწყების განცხადებაში.