ევროკავშირის ელჩი საქართველოში კარლ ჰარცელი პრემიერმინისტრ ირაკლი ღარიბაშვილის განცხადებასთან დაკავშირებით აცხადებს, რომ ის ევროპარლამენტარები, რომლებმაც წერილს ხელი მოაწერეს ევროპარლამენტის მუშაობაში მნიშვნელოვან როლს თამაშობენ. მან ბათუმში ვიზიტისას ჟურნალისტებთან, ასევე, აღნიშნა, რომ, როგორც ყოველთვის ისინი კომენტარს ინდივიდუალურ წერილებთან დაკავშირებით არ აკეთებენ.

"ის ევროპარლამენტარები, რომლებმაც ხელი მოაწერეს ამ წერილს, მნიშვნელოვან როლს თამაშობენ ევროპარლამენტის მუშაობაში და ევროკავშირის საგარეო პოლიტიკასთან დაკავშირებით ისევე, როგორც საქართველოსთან და აღმოსავლეთ პარტნიორობის ქვეყნებთან დაკავშირებით. რაც შეეხება ყოფილი პრეზიდენტის საკითხს, ევროკავშირის მიდგომაა, რომ ეს უნდა განიხილებოდეს კანონის უზენაესობის ფარგლებში, გამჭვირვალედ. ასევე, მივყვებით ისეთი ინსტიტუციების რჩევას, როგორიცაა სახალხო დამცველი, ვინც არის ასეთ საკითხებთან დაკავშირებით ძირითადი ინსტიტუცია. მთავარია ფუნდამენტური უფლებები დაცული იყოს, სამართლებრივი პროცესი გამჭვირვალე და სამართლიანი, კანონის უზენაესობის შესაბამისად", — განაცხადა ჰარცელმა.

მისივე თქმით, ის კომენტარები, რასაც ინდივიდუალური ევროპარლამენტარები აკეთებენ, მათი გადაწყვეტილებაა და მათზეა დამოკიდებული.

"მე არ მინდა ამ თემასთან დაკავშირებით სპეკულირება. რაც შეეხება ფუნდამენტურ უფლებებს, ეს არის ის უმაღლესი სტანდარტები, რაც უნდა იყოს დაცული, ეს არის პატიმართა უფლებები და პატიმრობის პირობები, რომელიც საერთაშორისო სამართლის უმაღლეს სტანდარტებს უნდა შეესაბამებოდეს", — აღნიშნა ევროკავშირის ელჩმა საქართველოში.

ირაკლი ღარიბაშვილის განცხადებით, "არც ფოტიგა და არც კუბილიუსი საქართველოსთვის არაფერს წარმოადგენენ". ასე გამოეხმაურა ის ევროპარლამენტარების წერილს, რომელიც ექსპრეზიდენტის, მიხეილ სააკაშვილის პატიმრობას ეხებოდა.

სამართლიანი სასამართლოს განაჩენამდე სააკაშვილის გათავისუფლების მოთხოვნით გამოქვეყნებულ ღია წერილს 72 პოლიტიკოსი აწერს ხელს. მათ შორის არიან, ევროპარლამენტარები, ყოფილი პრეზიდენტები, ელჩები, მინისტრები. მათი განცხადებით, ყოფილი პრეზიდენტის დაკავება პოლიტიკური კრიზისის გაღრმავებას ემსახურება. ავტორები ხაზს უსვამენ სასამართლოსადმი არარსებულ ნდობას საზოგადოების მხრიდან და ამბობენ, რომ საერთაშორისო დაკვირვება ამ პროცესს წინსვლაში დაეხმარება.

გაიგე მეტი: