"ევროსაბჭოს საპარლამენტო ასამბლეის (PACE) 51 დეპუტატი (24 სხვადასხვა ქვეყნიდან, გაწევრიანებულები 4 სხვადასხვა პოლიტიკურ ჯგუფში) ავრცელებს წერილობით დეკლარაციას - "ავტოკრატიული უკუსვლა საქართველოში" —- და პირველად ისტორიაში აპირებენ მინისტრთა კომიტეტისთვის მიმართვას საქართველოს ევროსაბჭოდან გასაძევებლად, თუ რამე არ შეიცვალა", — ამის შესახებ იურისტი გიორგი ბურჯანაძე წერს. მისივე თქმით, "დეკლარაციაში ავტოკრატიის მტკიცებულებად დასახელებულია ოპოზიციის განადგურების კამპანია, გამოხატვის თავისუფლების შეზღუდვა, სამოქალაქო საზოგადოების გაჩუმება და პოლიტიკური პატიმრობები/დევნები".

დეკლარაცია, რომელსაც ხელს ევროსაბჭოს საპარლამენტო ასამბლეის 51 დეპუტატი აწერს ხელს, PACE-ის ვებგვერდზე იძებნება და 19 აგვისტოთია დათარიღებული. დოკუმენტის ავტორი ევროპელი დეპუტატები წერენ, რომ "თუ საქართველო ავტორიტარული კურსის შეცვლის საკითხში პროგრესს არ მიაღწევს, არსებითი საფუძვლით გაასაჩივრებენ საქართველოს დელეგაციის უფლებამოსილებებს და მოუწოდებენ ასამბლეასა და მინისტრთა კომიტეტს, დაიწყონ საქართველოს გაძევების პროცესი ევროპის საბჭოს წესდების მე-3 მუხლში მითითებული ძირითადი პრინციპების სერიოზული დარღვევების გამო".

"2025 წლის 29 იანვარს, საპარლამენტო ასამბლეამ მიიღო რეზოლუცია 2585 (2025), რომლითაც რატიფიცირებულია საქართველოს დელეგაციის უფლებამოსილება იმ პირობით, რომ საქართველო 2025 წლის აპრილისთვის დააკმაყოფილებს დემოკრატიულ სტანდარტებს, მათ შორის პოლიტიკური პატიმრების გათავისუფლებას და ახალი საპარლამენტო არჩევნების გამოცხადებას გაუმჯობესებული საარჩევნო პირობების პირობებში.

სამაგიეროდ, სიტუაცია მკვეთრად გაუარესდა. ოპოზიციის წამყვანი ლიდერები დააპატიმრეს. სამოქალაქო საზოგადოების აქტივისტები და ჟურნალისტები პოლიტიკურად მოტივირებულ სისხლისსამართლებრივ დევნას ექვემდებარებიან.

ეს აღარ არის იზოლირებული ინციდენტების სერია, არამედ დემოკრატიული ოპოზიციის აღმოფხვრის, გამოხატვის თავისუფლების შეზღუდვისა და სამოქალაქო საზოგადოების გაჩუმებისკენ მიმართული ხანგრძლივი კამპანია.

გარდა ამისა, საქართველოს დელეგაციამ ცალმხრივად დატოვა ასამბლეა.

რეპრესიისა და განშორების ეს გზა არღვევს საქართველოს, როგორც ევროპის საბჭოს წევრის, ვალდებულებებს და ეწინააღმდეგება ასამბლეის უფლებამოსილებას.

ასამბლეამ უნდა დაიცვას თავისი წესები და რეზოლუციები. წევრი სახელმწიფოს შიგნით ავტორიტარული უკუქცევის იგნორირება ძირს უთხრის ამ ინსტიტუტის საფუძველს. თუ საქართველო ავტორიტარული კურსის შეცვლის საკითხში პროგრესს არ მიაღწევს, ჩვენ არსებითი საფუძვლით გავასაჩივრებთ შევუქმნით საქართველოს დელეგაციის უფლებამოსილებებს და მოვუწოდებთ ასამბლეასა და მინისტრთა კომიტეტს, დაიწყონ საქართველოს გაძევების პროცესი ევროპის საბჭოს წესდების მე-3 მუხლში მითითებული ძირითადი პრინციპების სერიოზული დარღვევების გამო", — წერია დოკუმენტში.

მიმდინარე წლის 10 აპრილს ევროსაბჭოს საპარლამენტო ასამბლეამ (PACE) საქართველოსთან დაკავშირებით ახალი კრიტიკული რეზოლუცია მიიღო. ასამბლეამ კიდევ ერთხელ მოუწოდა საქართველოს ხელისუფლებას, დაუყოვნებლივ აღადგინოს პირობები ჭეშმარიტად დემოკრატიული არჩევნებისთვის და გათავისუფლდნენ საპროტესტო აქციების დროს დაკავებულები.

ასამბლეის წინა რეზოლუციაში, რომელიც 29 იანვრით თარიღდება, ევროპარლამენტარები ოცნების ხელისუფლებას მოუწოდებდნენ, დაენიშნათ ვადამდელი არჩევნები და პოლიტპატიმრები გაეთავისუფლებინათ.

რეზოლუციის მიღებიდან მალევე, ქართული დელეგაციის ხელმძღვანელმა, თეა წულუკიანმა განაცხადა, რომ ოცნების გუნდის გადაწყვეტილებით, საქართველო ევროსაბჭოს საპარლამენტო ასამბლეაში მუშაობას წყვეტს.