ანკორიჯში რუსეთისა და ამერიკის პრეზიდენტებს შორის შეხვედრის შემდეგ ვლადიმერ პუტინის პატივსაცემად ვახშამი იყო დაგეგმილი. ამას აშშ-ის სახელმწიფო დეპარტამენტის პროტოკოლის სამსახურის დოკუმენტები ადასტურებს, რომელიც სასტუმროს პრინტერში დარჩათ. დოკუმენტები ამერიკის ეროვნულმა საზოგადოებრივმა რადიომ (NPR) მოიპოვა.

დოკუმენტების მიხედვით, პუტინის პატივსაცემად ანკორიჯში საზეიმო სადილი იგეგმებოდა, გაწერილი იყო მენიუც, დონალდ ტრამპს კი რუსეთის ლიდერისთვის საჩუქრად მაგიდაზე დასადგმელი ამერიკული თეთრთავიანი არწივის ქანდაკება უნდა გადაეცა. NPR წერს, რომ საბუთები სახელმწიფო საიდუმლო ინფორმაციას შეიძლება არ შეიცავდა, მაგრამ მომხდარი ფაქტი მიუთითებს ადმინისტრაციის თანამშრომელთა არაკომპეტენტურობასა და დაუდევრობაზე, რაც რისკის შემცველია.

დოკუმენტში მითითებულია პროტოკოლის თანამშრომლების სახელები და ტელეფონის ნომრები, დელეგაციის ადგილების, განლაგება და რუსული გვარების წარმოთქმის რჩევებიც კი - POO-tihn, Laav-rof და ა.შ. თეთრ სახლს ამ მონაცემებზე კომენტარი ჯერ არ გაუკეთებია, წერს NPR.

როგორც NPR წერს, რვა დაბეჭდილი გვერდი კაპიტან კუკის სასტუმროს სამმა სტუმარმა იპოვა და NPR-ს გადასცა სამხედრო ბაზასთან ახლოს, სადაც შეხვედრა გაიმართა — ისინი ყველა სტუმრისთვის ხელმისაწვდომ ერთ-ერთ პრინტერში იდო. დოკუმენტები პარასკევს, ადგილობრივი დროით დაახლოებით დილის 9 საათზე იპოვეს, ორი პრეზიდენტის ანკორიჯში ჩასვლამდე დაახლოებით ორი საათით ადრე.

დოკუმენტები კიდევ ერთხელ აჩვენებს, თუ რამდენად სპონტანური იყო ორ პრეზიდენტს შორის შეხვედრა და რომ მისი ფორმატი რამდენჯერმე შეიცვალა. ისინი ასახავენ გეგმას, რომლის მიხედვითაც თავდაპირველად ორმხრივი შეხვედრა იყო დაგეგმილი: რუსეთის პრეზიდენტი ვლადიმერ პუტინი და მისი საგარეო პოლიტიკის თანაშემწე იური უშაკოვი აშშ-ის პრეზიდენტ დონალდ ტრამპთან და მის სპეციალურ წარმომადგენელ სტივ ვიტკოფთან მოლაპარაკებებს გამართავდნენ.

შეხვედრამდე ცოტა ხნით ადრე გავრცელდა ინფორმაცია, რომ პრეზიდენტები თავდაპირველად პირისპირ ისაუბრებდნენ. საბოლოოდ, შეხვედრაში თითოეული მხრიდან სამ-სამი ოფიციალური პირი მონაწილეობდა: პუტინსა და უშაკოვს შეუერთდა რუსეთის საგარეო საქმეთა მინისტრი სერგეი ლავროვი, ხოლო ტრამპსა და ვიტკოფს — სახელმწიფო მდივანი მარკო რუბიო.