პრემიერმინისტრის, ირაკლი ღარიბაშვილის განცხადებით, "არც ფოტიგა და არც კუბილიუსი ჩვენი ქვეყნისთვის არაფერს წარმოადგენენ". ასე ეხმაურება ის ევროპარლამენტარების წერილს, რომელიც ექსპრეზიდენტის, მიხეილ სააკაშვილის პატიმრობას ეხება.

"არც ფოტიგა, არც არავინ, არც კუბილიუსი და არც არავინ, ჩემთვის და ჩვენი ქვეყნისთვის არაფერს არ წარმოადგენენ. ევროპარლამენტში არის 700 დეპუტატი და ჩვენ ვერც ფოტიგას ჭკუით ვივლით და ვერც კუბილიუსის, ყველამ მიხედოს თავის ქვეყანას", — განაცხადა მან.

ღარიბაშვილმა ევროპარლამენტარების წერილი შეაფასა გუშინ, 19 ოქტომბერსაც. მან თქვა, რომ სპეკულაციაა, თითქოს ევროპარლამენტარები "ბრძნული სახით" გამოდიან და "ბრძნულ რჩევებს" გვაძლევენ. მან, ასევე, თქვა, რომ არავითარი მნიშვნელობა არ აქვს, რომელი ევროპარლამენტარი რას იტყვის. ღარიბაშვილის განცხადებით, მნიშვნელობა აქვს იმას, რას იტყვის ხალხი.

სამართლიანი სასამართლოს განაჩენამდე სააკაშვილის გათავისუფლების მოთხოვნით გამოქვეყნებულ ღია წერილს 72 პოლიტიკოსი აწერს ხელს. მათ შორის არიან, ევროპარლამენტარები, ყოფილი პრეზიდენტები, ელჩები, მინისტრები. მათი განცხადებით, ყოფილი პრეზიდენტის დაკავება პოლიტიკური კრიზისის გაღრმავებას ემსახურება. ავტორები ხაზს უსვამენ სასამართლოსადმი არარსებულ ნდობას საზოგადოების მხრიდან და ამბობენ, რომ საერთაშორისო დაკვირვება ამ პროცესს წინსვლაში დაეხმარება.

გაიგე მეტი: