მართალია, დენზელ ვაშინგტონი 2-გზის ოსკაროსანი და ერთ-ერთი ყველაზე აღიარებული მსახიობია, თუმცა მას ხალხის აზრი მაინც არ ადარდებს.

დენზელ ვაშინგტონი 70 წლის ამერიკელი მსახიობია, რომელსაც თავისი სამსახიობო კარიერის მანძილზე უამრავი სამახსოვრო როლი აქვს შესრულებული. მისი უახლესი პროექტია 2025 წლის ფილმი — Highest 2 Lowest (უმაღლესიდან უდაბლესამდე).

ბოლო კვირის განმავლობაში დენზელმა საზოგადოების ყურადღება სხვადასხვა საკითხებზე საუბრით მიიპყრო — მას ბოლოდროინდელ ინტერვიუში ჟურნალისტმა ჰკითხა, დარდობდა თუ არა "დაქენსელებაზე", რაზეც მსახიობის პასუხი იყო:

"ვის ადარდებს? საზოგადოების მხარდაჭერა რატომაა ასეთი მნიშვნელოვანი? არ მადარდებს, ვინ ვის "მიჰყვება" (აფოლოვებს). არ შეიძლება, რომ ერთდროულად ლიდერი იყო და თან სხვას მიჰყვებოდე. არ შეიძლება, სხვას მიჰყვებოდე და ლიდერი იყო. მე არავის არ მივყვები. მე მხოლოდ ღვთაებრივ სულს, ღმერთს მივყვები და არა ადამიანებს. ღმერთის მწამს. ადამიანები მეიმედებიან, თუმცა მიმოიხედეთ — ეს იმედი არ მიმართლდება".

ამ ყველაფერს დაამატა მოსაზრება ქენსელ კულტურაზე, და აღნიშნა, რომ თუ ამ სისტემის ნაწილი არ გახდები, ვერ დაგაქენსელებენ:

ვერ დაგაქენსელებენ, თუ არ დარეგისტრირებულხარ. არ დარეგისტრირდეთ

რამდენიმე დღის წინ კი მსახიობმა ოსკარების შესახებ ისაუბრა და კინოინდუსტრიის უდიდესი ჯილდოს მიმართ საკუთარი დამოკიდებულება გაგვიზიარა. დენზელის პოზიცია ასეთია:

"დიდი ხანია, რაც ამ ყველაფერს ვაკეთებ. ყოფილა შემთხვევები, როცა არ ვიმსახურებდი გამარჯვებას და მაინც გავიმარჯვე, ყოფილა ისეთი შემთხვევებიც, როცა უნდა მომეგო, თუმცა ვერ მოვიგე. ოსკარებს ადამიანები გვაძლევენ, თუმცა ნამდვილ ჯილდოს ღმერთი გასცემს. სიცოცხლის ბოლო დღეს ოსკარები არაფერში არ გამომადგება".

ფოტო: MIKE NELSON/AFP via Getty

დენზელ ვაშინგტონის უახლესი ფილმი Highest 2 Lowest, რომელიც მისთვის ნაცნობ და გამოცდილ თანამშრომელთან, სპაიკ ლისთან ერთად გადაიღო, ამჟამად კინოთეატრებშია.

იხილეთ ტრეილერი: