2025 წლის 18 აგვისტოს, გაერო-ს უშიშროების საბჭომ დახურულ სხდომაზე რუსეთის მიერ ოკუპირებულ საქართველოს ტერიტორიებზე არსებული ვითარება და რუსეთ-საქართველოს კონფლიქტის საკითხი განიხილა.

შეხვედრის შემდეგ, გაეროში რუსეთის მუდმივი წარმომადგენლის მოადგილემ, დიმიტრი პოლიანსკიმ, რუსეთსა და საქართველოს შორის ურთიერთობების ნორმალიზების ორმხრივი სურვილი გამოაცხადა. მან შეაქო საქართველოს მთავრობა "სიბრძნისთვის" და განაცხადა, რომ ევროპა დაინტერესებულია საქართველოში უკრაინის მსგავსი სცენარის განვითარებით.

პოლიანსკის თქმით, საქართველოსა და რუსეთს შორის კავშირები ადასტურებს, რომ ორივე ქვეყანას მკაფიო სურვილი აქვს, აღადგინონ ორმხრივი კავშირები და ნორმალიზდეს ურთიერთობები”.

"რუსეთის სავაჭრო ბრუნვა საქართველოსთან 2.5 მილიარდ დოლარს შეადგენს. ჩვენ ვართ საქართველოს მეორე უმსხვილესი სავაჭრო პარტნიორი. გარდა ამისა, გასულ წელს საქართველოს 1.5 მილიონი რუსი ტურისტი ეწვია. ეს ადასტურებს ჩვენი ორივე ქვეყნის აბსოლუტურად მკაფიო სურვილს, აღადგინონ ორმხრივი კავშირები და ნორმალიზდნენ ურთიერთობები. თუმცა, რა თქმა უნდა, არიან ისეთებიც, ვინც არ არის დაინტერესებული მოვლენების ასეთი განვითარებით. ისინი თვლიან, რომ წარმატებას მიაღწიეს უკრაინასთან. თუმცა, საქართველოს ხელმძღვანელობამ საკმარისი სიბრძნე გამოიჩინა, რომ უარი ეთქვა ასეთ კატასტროფულ სცენარზე, რაც ჩვენს ევროპელ კოლეგებს არ აწუხებთ. ისინი ცდილობენ ყველაფერი გააკეთონ, რათა ჩვენი ქვეყანა იმავე ტრაგედიაში ჩაითრიონ, რომელშიც უკვე ჩათრიეს უკრაინა", — განაცხადა მან 19 აგვისტოს პრესკონფერენციაზე (კომენტარს ეხო კავკაზა ავრცელებს).

შეხვედრის შემდეგ, გაეროს უშიშროების საბჭოს რამდენიმე წევრმა, მათ შორის დანიამ, საფრანგეთმა, საბერძნეთმა, გაერთიანებულმა სამეფომ და სლოვენიამ, ასევე ახალმა წევრმა ლატვიამ, პრესკონფერენცია გამართეს, სადაც სლოვენიის მუდმივი წარმომადგენლის მოადგილემ გაეროში, ონდინა ბლოკარ დრობიჩმა, ერთობლივი განცხადება წაიკითხა.

პირველად ამერიკის შეერთებულმა შტატებმა ხელი არ მოაწერა ერთობლივ განცხადებას, რომელიც 2008 წლის აგვისტოს ომში რუსეთის ქმედებებს გმობს. გაეროს უშიშროების საბჭოს მიერ მომზადებულ დოკუმენტს ხელს აწერენ მხოლოდ ევროკავშირის წევრი სახელმწიფოები და დიდი ბრიტანეთი.

ოცნების ხელისუფლების საგარეო საქმეთა სამინისტროს ინფორმაციით, განცხადებაში აღინიშნა, რომ "17 წელი გავიდა საქართველოს წინააღმდეგ რუსეთის აგრესიისა და საქართველოს ტერიტორიაზე, აფხაზეთისა და ცხინვალის რეგიონებში შემდგომი უკანონო სამხედრო ყოფნიდან. 2008 წლის აგვისტოში რუსეთის მიერ საქართველოში შეჭრამ აჩვენა რუსეთის უფრო აგრესიული პოლიტიკის დასაწყისი მეზობლების მიმართ. რუსეთი აგრძელებს ამ გზას უკრაინის წინააღმდეგ თავისი არაპროვოცირებული და გაუმართლებელი აგრესიით.

განცხადებაში მტკიცედ არის მხარდაჭერილი საქართველოს დამოუკიდებლობა, სუვერენიტეტი და ტერიტორიული მთლიანობა მის საერთაშორისოდ აღიარებულ საზღვრებში. დაგმობილია გაერო-ს ქარტიის დარღვევით საქართველოში რუსეთის სამხედრო ძალების სასტიკი შეჭრა და განგრძობადი უკანონო სამხედრო ყოფნა, ასევე ეფექტიანი კონტროლის განხორციელება და ორი რეგიონის ანექსიისკენ გადადგმული ნაბიჯები.

დოკუმენტში ღრმა შეშფოთებით აღნიშნულია ის ფაქტი, რომ რუსეთმა არ შეასრულა ევროკავშირის შუამავლობით 2008 წლის 12 აგვისტოს დადებული ცეცხლის შეწყვეტის შეთანხმებით ნაკისრი ვალდებულებები, გაეყვანა თავისი ძალები საომარი მოქმედებების დაწყებამდე არსებულ ხაზებზე და უზრუნველეყო ადამიანის უფლებების საერთაშორისო მონიტორინგის მექანიზმების, როგორიცაა ადამიანის უფლებათა უმაღლესი კომისრის ოფისი, შეუფერხებელი დაშვება. განცხადების თანახმად, ქვეყნები რჩებიან ჟენევის საერთაშორისო მოლაპარაკებების (GID) ერთგულნი", — ნათქვამია უწყების მიერ გავრცელებულ ინფორმაციაში.