მოსამართლე ნინო გალუსტაშვილმა 26 წლის დავით ხომერიკს 4 წლითა და 6 თვით თავისუფლების აღკვეთა მიესაჯა. პროევროპულ აქციებში მონაწილეობისთვის დაკავებულებს შორის დავით ხომერიკი ერთადერთია, რომელსაც პროკურატურა აფეთქების მომზადებაში სდებდა ბრალს.

2 დეკემბერს, პოლიციამ დავით და ზუკა ხომერიკები გზის გადაკეტვის ბრალდებით, ადმინისტრაციული წესით დააკავა. ზუკა ხომერიკი რამდენიმე დღეში გაათავისუფლეს, ხოლო დავითს დანაშაულის სისხლის სამართლის მუხლით გადაუკვალიფიცირეს. პროკურატურა ამტკიცებს, რომ ხომერიკის ზურგჩანთაში 2 მოლოტოვის კოქტეილი აღმოაჩინეს. ხომერიკის საქმეში ნივთმტკიცებულებებია: აირწინაღი, საყვირი, ბინოკლი, საფულე, ბალაკლავა, კეპი, აბები, ხელთათმანი და ბოთლები "გაურკვეველი" სითხით.

ხომერიკის ადვოკატების განმარტებით, მოწმე პოლიციელი გიორგი ჯიქია, რომელმაც ხომერიკი დააკავა და გაჩხრიკა ამბობს, რომ ზემოაღნიშნული ბოთლები პირველად პოლიციის შენობაში ნახა, რაც ეჭვს ბადებს, როგორ ვერ შეამჩნია ისინი ჩხრეკის დროს. ადვოკატები ასევე საუბრობენ ხომერიკის საქმეში არსებულ დაკავების ოქმსა და პოლიციელი ჯიქიას ჩვენების უზუსტობაზე — ოქმს მოგვიანებით ბოლოს აქვს მიწერილი ნაჩქარებად ჯიქიას ჩვენება, რომ ხომერიკს პოლიციის შენობაში მიყვანამდე აღმოუჩინა აკრძალული ნივთები.

პროკურატურა თავის ბრალდებას ასევე ამყარებს ხომერიკის დაკავების ოქმზე ხელმოწერით. ხომერიკმა მრავალჯერ ისაუბრა სასამართლო პროცესებზე მის წინააღმდეგ განხორციელებულ ფიზიკურ და ფსიქოლოგიურ ძალადობაზე, თუ როგორ ემუქრებოდნენ მას გაუპატიურებით და მისი ასევე დაჭერილი ძმის უსაფრთხოებით. ხომერიკის განცხადებით მას ოქმზე დაშინებით მოაწერინეს ხელი და უარყოფ საქმეში არსებული ნივთების კუთვნილებას და დანაშაულის ჩადენას.

"პირიქით, მოძალადეები თვითონ იყვნენ. სცემეს, გაუპატიურებით დაემუქრნენ, სულ თავში ურტყეს. რისი გულისთვის?

რატომ ხდება ეს უსამართლობა ჩვენს ქვეყანაში, რომ სამართალი არ არსებობს? რა უნდათ ამ ჩემ შვილს რას ედავებიან? სამშობლოს სიყვარულს?” — დავით ხომერიკის დედის პირველი კომენტარი განაჩენის მოსმენის შემდეგ.

ცნობისთვის, მოსამართლე ნინო გალუსტაშვილმა 5 სინდისის პატიმარს გამოუტანა განაჩენი:

  • მათე დევიძე — პოლიციელზე თავდასხმის ბრალდება — 4 წელი და 6 თვე;
  • გიორგი მინდაძე — პოლიციელზე თავდასხმის ბრალდება — 5 წელი;
  • თეიმურაზ ზახოსაშვილი და დავით ლომიძე — მოლოტოვის კოქტეილი სროლა — 4 წელი და 6 თვე;
  • დავით ხომერიკი — აფეთქების მომზადება — 4 წელი და 6 თვე;