Reuters-ს აშშ-ის პრეზიდენტის, დონალდ ტრამპის ადმინისტრაციის მაღალჩინოსანმა განუცხადა, რომ რუსეთისა და უკრაინის პრეზიდენტებს შორის მაღალი დონის შეხვედრა შესაძლოა უნგრეთში გაიმართოს. სამიტს ვაშინგტონი აწყობს და მოსალოდნელია, რომ თავად ტრამპიც მიიღებს მასში მონაწილეობას. ამის შესახებ "ეხო კავკაზა" წერს.

გამოცემის თანახმად, ამერიკელ ლიდერს სამიტის ორგანიზება აგვისტოში სურს. მოლაპარაკებების შესაძლო ადგილი ჯერ არ გამოცხადებულა. თავად ტრამპი რუსეთის პრეზიდენტს, ვლადიმერ პუტინს, ალასკაში შეხვდა.

უნგრეთი ევროკავშირისა და NATO-ს წევრი ქვეყანაა. ჰააგაში მოქმედი სისხლის სამართლის საერთაშორისო სასამართლოს მიერ ევროკავშირის ქვეყნების ტერიტორიაზე პუტინის დაპატიმრების ორდერი არსებობს. თუმცა, 2023 წელს უნგრეთის პრემიერმინისტრის ადმინისტრაციის ხელმძღვანელმა განაცხადა, რომ ბუდაპეშტი რუსეთის პრეზიდენტს არ დააპატიმრებდა. გაზაფხულზე უნგრეთის ხელისუფლებამ სასამართლოდან გასვლის პროცედურა დაიწყო. გავრცელდა ინფორმაცია, რომ გასვლის პროცესს დაახლოებით ერთი წელი დასჭირდება.

ამავდროულად, ბუდაპეშტსა და კიევს შორის ურთიერთობები კრიტიკულად დაბალ დონეზეა. უნგრეთი უკრაინისთვის სამხედრო და ფინანსური დახმარებისა და ქვეყნის ევროკავშირში გაწევრიანების წინააღმდეგია.