აშშ-ს სახელმწიფო მდივანი მარკო რუბიო ახლად შექმნილ ერთობლივ კომისიას უხელმძღვანელებს, რომელიც უკრაინის უსაფრთხოების გარანტიების წინადადების შემუშავებაზე იმუშავებს. ინფორმაციას ამერიკული გამოცემა The Hill ავრცელებს.

კომისია აშშ-ის, უკრაინის, ევროპის და NATO-ს წარმომადგენლებისგან შედგება.

"მომდევნო დღეებში ყველა მზის ამოსვლიდან დაღამებამდე უსაფრთხოების გარანტიებზე იმუშავებს. შესაძლოა, კვირის ბოლომდე გარკვეული არქიტექტურა შეიქმნა," — გამოცემა Axios-ის ცნობით, განაცხადა რუბიომ.

კომისიის შექმნის შესახებ ორშაბათს, თეთრ სახლში პრეზიდენტ ტრამპსა და ვაშინგტონში ვიზიტად მყოფ შვიდ ევროპელ ლიდერს შორის შეხვედრის დროს შეთანხმდნენ.

კომისიის ხელმძღვანელად რუბიოს დანიშვნის შესახებ ინფორმაცია პირველად The Wall Street Journal-მა გაავრცელა. გამოცემა ორშაბათს საღამოს იუწყებოდა, რომ უკრაინის უსაფრთხოების გარანტიები ოთხი ნაწილისგან შედგება: საჰაერო თავდაცვა, სამხედროების ყოფნა, საბრძოლო მოქმედებების შეწყვეტის თვალყურის დევნება და შეიარაღება.

The Hill წერს, რომ რუბიო, რომელიც ასევე ტრამპის ეროვნული უსაფრთხოების მრჩეველია, შეერთებული შტატების სამი ჩინოვნიკიდან ერთ-ერთი იყო, ვინც მონაწილეობდა პარასკევს ალასკაში რუსეთის დელეგაციასთან დახურულ კარს მიღმა შეხვედრაში, რომელსაც რუსეთის პრეზიდენტი ვლადიმერ პუტინი ხელმძღვანელობდა.

გამოცემის ცნობითვე, ორშაბათს, თეთრ სახლში უკრაინის პრეზიდენტ ვოლოდიმირ ზელენსკისთან და ევროპელ ლიდერებთან შეხვედრის შემდეგ ტრამპი პუტინს ტელეფონით ესაუბრა. აშშ-ის პრეზიდენტმა პუტინს უთხრა, რომ ადმინისტრაცია კრემლის ლიდერსა და ზელენსკის შორის შეხვედრას დანიშნავდა.

ამ დროისთვის მხარეებს შეხვედრის შესახებ საბოლოოდ შეთანხმება არ აქვთ მიღწეული, შესაბამისად უცნობია როდის ვიხილავთ ზელენსკისა და პუტინს პირისპირ ფორმატში.

შეგახსენებთ, რომ ტრამპმა სამშაბათს უსაფრთხოების გარანტიების ფარგლებში კიევისთვის საჰაერო მხარდაჭერის გაწევის ისაუბრა.

"ჩვენ მზად ვართ დავეხმაროთ მათ, განსაკუთრებით, ალბათ, საჰაერო გზით, რადგან არავის აქვს ის, რაც ჩვენ გვაქვს," — განაცხადა ტრამპმა.

რუსეთის საგარეო საქმეთა მინისტრმა NATO-ს ლიდერები გააფრთხილა, რომ სამშვიდობო შეთანხმების ფარგლებში უკრაინაში NATO-ს ძალების გამოძახების წინააღმდეგია.