"იმის გამო, რომ გოგიტა თანიაშვილმა დააყენა ჭონქაძის თემში დამოუკიდებლად კანდიდატურა, არსებული საკრებულოს თავმჯდომარე კახა ჩიტაური იბარებს მას სასაფლაოზე და უსწორდება ფიზიკურად," — ამის შესახებ ადგილობრივმა ოპოზიციონერმა ზურა ოტიაშვილმა "TV პირველს" განუცხადა.

მისივე თქმით, თანიაშვილს კანდიდატურის მოხსნას სთხოვდნენ.

"იმის გამო, რომ გოგიტა თანიაშვილმა დააყენა ჭონქაძის თემში დამოუკიდებლად კანდიდატურა, არსებული საკრებულოს თავმჯდომარე კახა ჩიტაური იბარებს მას სასაფლაოზე და უსწორდება ფიზიკურად. იქ იმყოფებოდა ოცნების შტაბის ე.წ. "გენერალი" ვინმე შერმადინი, რომელიც ჩართული იყო ფიზიკურ ანგარიშსწორებაში. როგორც ჩვენი წყარო გვეუბნება, ვინც ეს ინფორმაცია მოგვაწოდა, ისინი სთხოვდნენ მათთან შეუთანხმებლად რატომ დარეგისტრირდა დამოუკიდებელ კანდიდატად, სწორედ ამაზე იყო საუბარი და ალბათ დაშინებით, მუქარით სთხოვდნენ, რომ კანდიდატურა მოეხსნა" — განაცხადა ზურა ოტიაშვილმა "TV პირველთან" საუბრისას.

თავად გოგიტა თანიაშვილი ინფორმაციას უარყოფს. "არაფერი არ მომხდარა, არაფერ შუაში არ ვარ მაგ ჩხუბთან," — ამბობს გოგიტა თანიაშვილი "TV პირველთან". ტელეკომპანიის ცნობით, რამდენიმე კითხვის შემდეგ, თანიაშვილმა არც უარყო და არც დაადასტურა ინფორმაცია.

თანიაშვილი და ჩიტაური არ პასუხობენ კითხვას, გამოჰკითხეს თუ არა ძალოვანმა უწყებებმა ამ საქმეზე. დეტალების გასარკვევად News.On.ge შინაგან საქმეთა სამინისტროს დაუკავშირდა. უწყებაში აცხადებენ, რომ ფაქტის შესახებ ინფორმაცია ჯერჯერობით არ აქვთ.

რაც შეეხება კახა ჩიტაურს, რომელიც ოცნების საკრებულოს თავმჯდომარე და ამჟამად მერობის კანდიდატია, ამბობს, რომ არანაირ ანგარიშსწორებას ადგილი არ ჰქონია და ამტკიცებს, რომ გოგიტა თანიაშვილი მისი მეგობარია.

"გოგიტა თანიაშვილი ჩემი მეგობარია და გამორიცხულია, ვერც ერთი ადამიანი ვერ იტყვის მაგას... საერთოდ წარმოდგენა არ მაქვს სად არის ჟინვალის სასაფლაო," — უთხრა "TV პირველს" ჩიტაურმა

დუშეთში, ოცნების მერობის კანდიდატის მხრიდან ოპონენტზე სავარაუდო მუქარისა და ძალადობის შესახებ ინფორმაცია ადგილობრივმა ოპოზიციონერმა ზურა ოტიაშვილმა სოციალურ ქსელში გუშინ, 19 აგვისტოს გაავრცელა.

"თავდასხმა და კრიმინალური გარჩევები დუშეთის ოცნების შტაბიდან.

არალეგიტიმური მთავრობის მიერ წარდგენილი დუშეთის მერობის კანდიდატი, კახაბერ ჩიტაური, და შტაბის ე.წ. "გენერალი", მამუკა შერმადინი, ჟინვალის სასაფლაოზე სასტიკად გაუსწორდნენ დამოუკიდებელ კანდიდატს ჭონქაძის თემში გოგიტა თანიაშვილს.

დანის მუქარით სთხოვდნენ, მოეხსნა კანდიდატურა. უარის შემდეგ ისინი გამძვინვარებულები ფიზიკურად გაუსწორდნენ და მას მძიმე დაზიანებები მიაყენეს.

მთავარი პოლიტიკური ძალის წარმომადგენლები ღიად მიმართავენ ძალადობას და კრიმინალურ მეთოდებს, რითაც ასახავენ იმას, თუ რა რეალურ ძალებზე დგას მათი მმართველობა. ქართული ოცნების შტაბი მხარს უჭერს არა დემოკრატიულ წესებს, არამედ კრიმინალსა და ძალადობას, რაც კიდევ ერთხელ ადასტურებს, რომ მათი მთავარი იარაღი დაშინება და ზეწოლაა", — წერს ზურა ოტიაშვილმა სოციალურ ქსელში.