მაშინ, როდესაც ავღანეთის ვიცე-პრეზიდენტი ქვეყანას არ ტოვებს და მოსახლეობას თალიბების წინააღმდეგ ბრძოლისკენ მოუწოდებს, ყოფილი პრეზიდენტი ჰამიდ კარზაი თალიბანის ერთ-ერთ ლიდერს შეხვდა. ამის შესახებ ინფორმაციას Reuters თალიბანის ოფიციალური წარმომადგენლის ინფორმაციაზე დაყრდნობით ავრცელებს, რომელმაც ვინაობის გამხელა არ ისურვა.

კარზაიმ, რომელიც ავღანეთს 2001-2014 წლებში სხვადასხვა და მათ შორის, პრეზიდენტის სტატუსით მართავდა, შეხვედრა თალიბანის ერთ-ერთ მეთაურთან — ჰაქანის ქსელის მებრძოლი ჯგუფის ლიდერთან, ანას ჰაქანისთან "მოლაპარაკებების დასაწყებად" გამართა.

თალიბანის ინფორმაციით, კარზაის თან ახლდა ძველი მთავრობის წარმომადგენელი, მშვიდობის მთავარი დესპანი, აბდულა აბდულა. თუმცა, ის შეხვედრის შესახებ სხვა დეტალებზე ჯერჯერობით არ საუბრობს.

ჰაქანის ქსელი არის თალიბანის მნიშვნელოვანი ფრაქცია, რომელმაც კვირას ქაბული დაიპყრო. ეს ქსელი დაფუძნებულია პაკისტანის საზღვართან და ბოლო წლების განმავლობაში ავღანეთის ჯარზე განხორციელებული ყველაზე სასტიკი და სასიკვდილო თავდასხმებით არის ცნობილი.

თალიბანმა 15-16 აგვისტოს ავღანეთის დედაქალაქი ქაბულიც აიღო და განაცხადა, რომ "ომი დასრულდა". 15 აგვისტოს, მას შემდეგ, რაც თალიბანი დედაქალაქს მიადგა, ქვეყანა პრეზიდენტმა და მთავრობის რამდენიმე წევრმა დატოვა. მებრძოლები პრეზიდენტის სასახლეში შევიდნენ და ახლა ადმინისტრაციას ისინი აკონტროლებენ. თუმცა, ხელისუფლების რამდენიმე წარმომადგენელი ქვეყანაში ამ დრომდე ქვეყანაში რჩება. მათ შორის არის ავღანეთის ვიცე-პრეზიდენტი ამრულა სალეჰი, რომელიც მოსახლეობას თალიბანის წინააღმდეგ ბრძოლისკენ მოუწოდებს.

თავდაპირველად თალიბები ამბობდნენ, რომ ქალაქის ბრძოლით აღება და სისხლისღვრა არ სურთ, მხოლოდ შესასვლელთან გამაგრდებიან და ხელისუფლების მშვიდობიანად გადაბარებისთვის მოემზადებიან, თუმცა მოგვიანებით რამდენიმე დასახლებაში შევიდნენ — ქალაქში ისმოდა სროლის ხმა, არიან დაშავებულები. თალიბების მტკიცებით, ეს იმიტომ გააკეთეს, რომ პოლიციამ და მთავრობამ ქალაქი დატოვა და "წესრიგის უზრუნველყოფა" იყო საჭირო.

პრობლემურ საკითხად იქცა დიპლომატიური კორპუსის წარმომადგენლებისა და უცხო ქვეყნის მოქალაქეების უსაფრთხოდ გაყვანა. აშშ-მ საელჩოს თანამშრომლების ევაკუაცია თალიბების მისვლისთანავე დაიწყო. ისინი ვერტმფრენით გადაიყვანეს ქაბულის აეროპორტში. ამავე აეროპორტიდან ახორციელებდნენ ევაკუაციას სხვა ქვეყნებიც. რამდენიმე საათში აეროპორტს ათასობით ადამიანი მიადგა, რომელსაც ავღანეთიდან გაქცევა სურდა — ისინი თვითმფრინავში შეჭრას ცდილობდნენ.

ქვეყნების უმრავლესობამ ქაბულში საელჩოები დახურა და დიპლომატიური კორპუსის გაყვანას ცდილობს. გამონაკლისი რუსეთი, ჩინეთი და ირანია, რომლებიც ამბობენ, რომ მუშაობას აგრძელებენ.