რუსეთი ქაბულიდან დიპლომატების ევაკუაციას არ აპირებს. ამის შესახებ პროსახელისუფლებო მედია RIA საგარეო საქმეთა სამინისტროს წარმომადგენელზე დაყრდნობით წერს.

"საელჩოს ევაკუაცია არ იგეგემება. მე მაქვს კონტაქტი ჩვენს ელჩთან და ისინი მშვიდად მუშაობენ, ყურადღებით აკვირდებიან მოვლენების განვითარებას", — განუცხადა ზამიქ ქაბულოვმა RIA-ს.

იმავე ინფორმაციას ავრცელებდა 2 დღის წინ სახელისუფლებო სააგენტო TASS. საელჩოს წარმომადგენლეზე დაყრდნობით ისინი წერდნენ, რომ ამ ეტაპზე რუსეთი ამ ვარიანტს არ განიხილავს.

რუსეთისგან განსხვავებით, სხვა ქვეყნებმა დიპლომატიური მისიებისა და მოქალაქეების ევაკუაცია დაიწყეს. აშშ-მ და დიდმა ბრიტანეთმა ავღანეთში ჯარები გაგზავნეს მას შემდეგ, რაც თალიბანმა დიდი ქალაქების აღება დაიწყო.

თალიბანის მეომრები ავღანეთის დედაქალაქ ქაბულში შევიდნენ. ეს ბოლო ყველაზე დიდი და მნიშვნელოვანი ქალაქი იყო, რომელიც თალიბანი არ აკონტროლებდა. არსებული ინფორმაციით, თალიბანს ქალაქი არ აუღია და მის შემოგარენში არიან განლაგებული, თუმცა რამდენიმე რეგიონში მეომრები უკვე შევიდნენ.

REUTERS-ს ავღანეთის შინაგან საქმეთა სამინისტროზე დაყრდნობით წერს, რომ თალიბანის მეომრები ქალაქში ყველა მხრიდან შედიოდნენ, თუმცა დამატებითი დეტალები უცნობია. გამოცემის ინფორმაციით, აშშ-ს საელჩოდან დიპლომატების ევაკუაცია ვერტმფრენით განხორციელდა. AP ავღანეთის ხელისუფლების მაღალჩინოსნებზე დაყრდნობით აცხადებს, რომ თალიბები დედაქალაქის 3 რაიონში, კალაკანში, ყარაბაღსა და ფაღმანში არიან.

The Guardian-ის ინფორმაციით, თალიბანის პრესსპიკერმა განაცხადა, რომ არ აპირებენ "სამაგიერო გადაუხადონ" არავის, მათ შორის მათ, ვინც ავღანეთის ხელისუფლებაში მუშაობდა. Aljazeera-ს ინფორმაციით, თალიბანმა განცხადება გაავრცელა, სადაც აღნიშნულია, რომ ქალაქის ძალით აღებას არ აპირებენ და მიმდინარეობს მოლაპარაკებები, რომ "გარდამავალი პროცესი უსაფრთხოდ დასრულდეს".

ავღანეთში ძალადობა მას შემდეგ გაიზარდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, დასრულდება. აშშ-მ მთავარი სტრატეგიული წერტილი — ბაგრამის ავიაბაზა, უკვე დატოვა.