რუსეთის შემდეგ ჩინეთის ხელისუფლებამაც გააკეთა განცხადება, რომ ავღანეთიდან საელჩოს ევაკუაციას არ აპირებს. ხელისუფლებამ თავის მოქალაქეებს მოუწოდა, დარჩნენ სახლებში და სიფრთხილე გამოიჩინონ. ამის შესახებ ინფორმაციას BBC ავრცელებს.

ამასთან, ჩინეთის ხელისუფლება აცხადებს, რომ მათ "ავღანეთის სხვადასხვა ფრაქციას" მიმართეს თხოვნით, რათა დაიცვან ავღანეთში მყოფი ჩინეთის მოქალაქეების უსაფრთხოება.

მას შემდეგ, რაც ავღანეთის პრეზიდენტმა ქვეყანა დატოვა, ქვეყნებმა ქაბულიდან საელჩოების ევაკუაცია დაიწყეს. ქაბულიდან საელჩოს გაყვანას რუსეთი არ აპირებს.

აღსანიშნავია, რომ თალიბანის წარმომადგენლები ჩინეთში ივლისის ბოლოს ჩავიდნენ, სადაც საგარეო საქმეთა მინისტრს შეხვდნენ. შეხვედრის შემდეგ ჩინეთის საგარეო საქმეთა სამინისტრომ განაცხადა, რომ ავღანეთთან მიმართებით მის შიდა საქმეში ჩაურევლობის პოლიტიკით იხელმძღვანელებს. ეს კი ჩინეთის მხრიდან თალიბანის პოლიტიკურ აქტორად აღიარებად შეფასდა.

თალიბანმა პირველი დიდი ქალაქის აღება 6 აგვისტოს მოახერხა, ათ დღეში კი მთელ ქვეყანას აკონტროლებს. ავთანეთში თალიბანი მას შემდეგ გააქტიურდა, რაც აშშ-მა და სხვა საერთაშორისო ძალებმა 20-წლიანი სამხედრო ოპერაციების შემდეგ, 1 მაისიდან ქვეყნიდან ჯარების გაყვანა დაიწყეს. აშშ-ის პრეზიდენტის გადაწყვეტილებით, ამერიკის მისია ავღანეთში დაგეგმილზე ადრე, 31 აგვისტოს, უნდა დასრულებულიყო. აშშ-ს ამ დროისთვის მთავარი სტრატეგიული წერტილი — ბაგრამის ავიაბაზა, უკვე დატოვებული ჰქონდა. ავღანეთში ამერიკელ სამხედროთა მხოლოდ მცირე ჯგუფი რჩებოდა და ისინი საელჩოს იცავდნენ. ივნისის ბოლოს The Wall Street Journal-მა აშშ-ის დაზვერვის სამსახურთან დაახლოებული პირების ინფორმაციაზე დაყრდნობით გაავრცელა, რომ დაზვერვის სამსახურის დასკვნით, რომელიც ჯერ ოფიციალურად არ გამოქვეყნებულა, აშშ-ის ძალების მიერ ავღანეთის დატოვებიდან 6 თვეში შესაძლოა, ქაბულის მთავრობა დაეცეს.

გაიგეთ მეტი