გაეროს უშიშროების საბჭო ავღანეთში მიმდინარე პროცესებთან დაკავშირებით ერთობლივ განცხადებას ავრცელებს, რომელიც მოუწოდებს "ყველა საომარი მოქმედების დაუყოვნებლივ შეწყვეტისა" და "ახალი მთავრობის შექმნისკენ, რომელიც იქნება ერთიანი, ინკლუზიური და წარმომადგენლობითი, მათ შორის ქალების სრული, თანაბარი და მნიშვნელოვანი მონაწილეობით". ამის შესახებ ინფორმაციას CNN ავრცელებს.

ავღანეთში შექმნილი მდგომარეობის გამო, გაეროს უშიშროების საბჭომ შეხვედრა დღეს, 16 აგვისტოს, ნიუ იუორკში გამართა. შეხვედრის შემდეგ კონსულტაცია დახურულ კარს მიღმა გაიმართა, რის შემდეგაც ერთობლივი განცხადება გაავრცელეს, სადაც ასევე გამოხატულია "ღრმა შეშფოთება" საერთაშორისო ჰუმანიტარული ნორმების და ადამიანის უფლებების დარღვევის გამო და "ხაზი გაუსვა დამნაშავეთა პასუხისგებაში მიცემის გადაუდებელ აუცილებლობას".

გარდა ამისა, საბჭომ მოუწოდა საერთაშორისო საზოგადოებას, გაძლიერდეს ერთობლივი ძალისხმევა ავღანეთში ჰუმანიტარული დახმარების გაწევისთვის და მოუწოდა ყველა მხარეს, დაუშვას გაეროს სააგენტოების ჰუმანიტარული დახმარების შეუფერხებელი წვდომა.

”უშიშროების საბჭოს წევრებმა დაადასტურეს ავღანეთში ტერორიზმთან ბრძოლის მნიშვნელობა იმის უზრუნველსაყოფად, რომ ავღანეთის ტერიტორია არ იქნას გამოყენებული რომელიმე ქვეყანაზე მუქარის ან თავდასხმისთვის; ასევე, არც თალიბანმა და არც სხვა რომელიმე ავღანურმა ჯგუფმა ან პირმა არ უნდა დაუჭიროს მხარი ტერორისტებს ნებისმიერი სხვა ქვეყნის ტერიტორიაზე“, — ნათქვამია განცხადებაში.

თალიბანმა ავღანეთის დედაქალაქი ქაბულიც აიღო და განაცხადა, რომ "ომი დასრულდა". გუშინ, 15 აგვისტოს, მას შემდეგ, რაც თალიბანი დედაქალაქს მიადგა, ქვეყანა პრეზიდენტმა და მთავრობის რამდენიმე წევრმა დატოვა. მებრძოლები პრეზიდენტის სასახლეში შევიდნენ და ახლა ადმინისტრაციას ისინი აკონტროლებენ.

თავდაპირველად თალიბები ამბობდნენ, რომ ქალაქის ბრძოლით აღება და სისხლისღვრა არ სურთ, მხოლოდ შესასვლელთან გამაგრდებიან და ხელისუფლების მშვიდობიანად გადაბარებისთვის მოემზადებიან, თუმცა მოგვიანებით რამდენიმე დასახლებაში შევიდნენ — ქალაქში ისმოდა სროლის ხმა, არიან დაშავებულები. თალიბების მტკიცებით, ეს იმიტომ გააკეთეს, რომ პოლიციამ და მთავრობამ ქალაქი დატოვა და "წესრიგის უზრუნველყოფა" იყო საჭირო.

გუშინ დილიდანვე პრობლემურ საკითხად იქცა დიპლომატიური კორპუსის წარმომადგენლებისა და უცხო ქვეყნის მოქალაქეების უსაფრთხოდ გაყვანა. აშშ-მ საელჩოს თანამშრომლების ევაკუაცია თალიბების მისვლისთანავე დაიწყო. ისინი ვერტმფრენით გადაიყვანეს ქაბულის აეროპორტში. ამავე აეროპორტიდან ახორციელებდნენ ევაკუაციას სხვა ქვეყნებიც. რამდენიმე საათში აეროპორტს ათასობით ადამიანი მიადგა, რომელსაც ავღანეთიდან გაქცევა სურდა — ისინი თვითმფრინავში შეჭრას ცდილობდნენ, აეროპორტში ამ დრომდე უკონტროლო სიტუაციაა.

ქვეყნების უმრავლესობამ ქაბულში საელჩოები დახურა და დიპლომატიური კორპუსის გაყვანას ცდილობს. გამონაკლისი რუსეთი და ჩინეთია, რომლებიც ამბობენ, რომ მუშაობას აგრძელებენ.

ქაბულში დილა თალიბანის მმართველობის ქვეშ გათენდა. ქუჩებს შეიარაღებული დაჯგუფებები აკონტროლებენ.