ჯანდაცვის მინისტრის მოადგილის, თამარ გაბუნიას ინფორმაციით მიმდინარეობს მუშაობა, რომ გაიზარდოს გეოგრაფიული ხელმისაწვდომობა Pfizer-ის ვაქცინაზე. ის ამბობს, რომ კვირის ბოლომდე გაიხსნება დამატებითი ვაქცინაციის ცენტრები რეგიონებშიც.

"ამ ეტაპზე მიმდინარეობს მუშაობა იმაზე, რომ გათანაბრდეს გეოგრაფიული ხელმისაწვდომობა და ახლა Pfizer-ის ამცრელი კაბინეტები დაემატება სხვა რეგიონულ წერტილებშიც, იმისთვის, რომ ყველა ჰოსპიტალში ჰქონდეს მოსახლეობას Pfizer-ის მიღების შანსი", — განაცხადა თამარ გაბუნიამ.

ის ამბობს, რომ ამ აცრების ყოველდღიური მაჩვენებელი ამ ეტაპზე სასურველზე ორჯერ ნაკლებია.

"ორშაბათს დაიწყო Pfizer-ით ვაქცინაცია. ბოლო ორი დღის განმავლობაში — 26 ივლისს და 27 ივლისს — ვაქცინირებული პირების რაოდენობა იყო 14 000-მდე. ჩვენი სამიზნე არის თითქმის 2-ჯერ უფრო მეტი, ვიდრე ეს მაჩვენებელია. ამდენად, კვირის ბოლომდე იგეგმება დამატებითი ვაქცინაციის ცენტრების გაზრდა იმისთვის, რომ ვაქცინაციის მაჩვენებელი გაიზარდოს. 25-30 ათასი არის სამიზნე მაჩვენებელი, რომელიც ჩვენ გვინდა, რომ მიიღწეს", — განაცხადა თამარ გაბუნიამ.

დღეს ჯანდაცვის მინისტრმა ეკატერინე ტიკარაძემ და თამარ გაბუნიამ აშშ-ს ელჩს საქართველოში, კელი დეგნანას თბილისის რესპუბლიკურ საავადმყოფოში ვაქცინაციის პროცესი გააცნეს. დეგნანამა განაცხადა, რომ ვაქცინაცია საუკეთესო გზაა როგორც საკუთარი თავის და საყვარელი ადამიანების, ისე ქვეყნის ეკონომიკის დასაცავად.

გაიგე მეტი: