ჯანდაცვის მინისტრის, ეკატერინე ტიკარაძის განცხადებით, ამ ეტაპზე ექიმებისთვის სავალდებულო ვაქცინაციის საკითხი არ განიხილება, ვინაიდან ელოდებიან, თუ როდის მიიღებენ ისინი დამოუკიდებელ გადაწყვეტილებას აცრასთან დაკავშირებით.

"ჩვენ არ განვიხილავთ ამ ეტაპისთვის სავალდებულო ვაქცინაციას, ვინაიდან ვთვლით, რომ ექიმებმა ყველაზე კარგად იციან თუ რამდენად მნიშვნელოვანია ვაქცინაცია თითოეული ჩვენი მოქალაქის და ასევე, მათი ჯანმრთელობისთვის. აქედან გამომდინარე, ჩვენ ველოდებით, თუ როდის მიიღებენ ისინი დამოუკიდებელ გადაწყვეტილებას", — განაცხადა ჯანდაცვის მინისტრმა.

28 ივლისის მონაცემებით, საქართველოში კორონავირუსის 3 141 ახალი შემთხვევა დადასტურდა, გამოჯანმრთელდა 1 509, ხოლო გარდაიცვალა — 20 ადამიანი.

ბოლო 24 საათში ქვეყნის მასშტაბით ჩატარდა 40 553 კვლევა ტესტით, მათ შორის, 23 242 კვლევა ანტიგენის ტესტით და 17 311 PCR ტესტით.

რაც შეეხება დადებითობის მაჩვენებელს, 28 ივლისის მდგომარეობით, დადებითობის დღიური მაჩვენებელი არის 7.75%, ბოლო 7 დღის მანძილზე — 6,92%, ხოლო 14 დღის მანძილზე — 6,28%.