30 ივნისს ევროკომისიამ განაცხადა, რომ მოქალაქეების პეტიციის საფუძველზე მათ ახალ კანონპროექტზე მუშაობა დაიწყეს, რომლის მიზანიც ფერმერულ მეურნეობაში ცხოველების დამწყვდევის აკრძალვაა.

კომისიის თქმით, კანონპროექტი, რომელიც სავარაუდოდ 2023 წელს შევა ძალაში, 2027 წლისთვის დატყვევებული ცხოველების ფერმის პრაქტიკის აღმოფხვრასა და, საბოლოოდ, აკრძალვას ითვალისწინებს. აღნიშნულ ინიციატივას მილიონზე მეტმა ადამიანმა მოაწერა ხელი.

პრაქტიკის აკრძალვა ფერმერულ მეურნეობაში ჩართულ ყველანაირ ცხოველს მოიაზრებს, მათ შორის ბოცვრებს, ვარიებს, იხვებსა და ბატებს. კვერცხისმდებელი ქათმები, ღორები, რომლებსაც გოჭები ჰყავთ და ხბოები დამწყვდევისგან უკვე დაცულები არიან ევროკავშირის კანონმდებლობით (მიუხედავად იმისა, რომ კვერცხისმდებელი ქათმებისთვის დასაშვებია "მოწყობილი" გალიები, სადაც იმაზე ცოტათი მეტი სივრცეა, ვიდრე ქათმებისთვის ჩვეულებრივაა ხოლმე განკუთვნილი).

კანონპროექტის ძალაში შესვლის შემდეგ მის აღსრულებასა და გათვალისწინებული წესების დაცვაზე ევროპარლამენტი და ორგანიზაციის 27 ქვეყნის მთავრობები იქნებიან პასუხისმგებელნი.

"ცხოველები მგრძნობიარე არსებები არიან და ჩვენ, როგორც საზოგადოებას, გვაქვს მორალური პასუხისმგებლობა, რომ ეს ფერმებში მყოფი ცხოველების პირობებზე აისახოს", — განაცხადა ევროკავშირის ჯანდაცვის კომისარმა, სტელა კირიაკიდესმა.

აღსანიშნავია, რომ ევროკავშირში ცხოველთა საარსებო პირობების სტანდარტები მსოფლიოში ერთ-ერთ საუკეთესოდ მიიჩნევა, მიუხედავად იმისა, რომ ფერმებში ბოცვრების 90 პროცენტი გალიებში ცხოვრობს, 2019 წლის მონაცემებით კი კვერცხისმდებელი ქათმების ნახევარიც დამწყვდეულია.

"ის ისტორიული მომენტია, როცა სიტუაცია უკეთესობისაკენ იცვლება. ცხოველთა უფლებადამცველმა მოძრაობამ ნამდვილად მოახერხა, საფუძველი ჩაეყარა ახალი ეპოქისათვის", — ამბობს ოლგა კიკუ, კამპანიის ხელმძღვანელი და პეტიციის ერთ-ერთი ინიციატორი.

ინიციატივას მხარი დაუჭირა და ფერმებში არსებულ პირობებზე ყურადღება გაამახვილა ევროპარლამენტმაც.

კომისიის განცხადებით კი, ფერმერები ევროკავშირისგან სუბსიდიებს მიიღებენ, რათა საქმიანობის ახალ სისტემაზე გადაეწყონ. ორგანიზაციის წევრ ქვეყნებს ასევე შეუძლიათ, ევროკავშირს კოვიდპანდემიიდან აღსადგენად განკუთვნილი $951 მილიარდიდან წილის გამოყოფის თხოვნით მიმართონ.

სამომავლოდ ბრიუსელში ევროკავშირის ცხოველთა პირობების გასაუმჯობესებლად მიღებული კანონპროექტების გაფართოებასაც აპირებენ.