რუსეთის საგარეო დაზვერვის სამსახურის დირექტორი, სერგეი ნარიშკინი საქართველოში მიმდინარე მოვლენებზე თავის მოსაზრებას ავრცელებს და ამტკიცებს, რომ ამერიკა საქართველოში პოლიტიკურ პროცესებს მართავს, ხოლო ქართულმა ოცნებამ მითითებების შესრულებაზე უარი თქვა.

როგორც ნარიშკინი აცხადებს, აშშ წლებია "მექანიკური რეჟიმით" მართავს საქართველოს პოლიტიკურ პროცესებს. რუსეთის დაზვერვის განცხადება დროში ემთხვევა საქართველოში მიმდინარე დაძაბულ პოლიტიკურ პროცესებს, რომელთა მოსაგვარებლად აშშ-სა და ევროკავშირის წარმომადგენლობები ფასილიტატორების როლს ასრულებენ.

"ბოლო პერიოდში ვაშინგტონში იზრდება უკმაყოფილება მმართველი პარტიის, ქართული ოცნების მიმართ, რომელიც უარს ამბობს, უსიტყვოდ შეასრულოს ამერიკელების მოთხოვნები. თეთრ სახლში გაღიზიანებულნი არიან, რომ "მეოცნებეები" არ ასრულებენ შეთანხმებას, უსიტყვოდ მისდიონ ევროატლანტიკური ინტეგრაციის კურსს", — ნათქვამია ნარიშკინის განცხადებაში, თუმცა რის საფუძველზე ამბობს ამას, ხაზგასმული არ არის.

ნარიშკინი თავის განცხადებაში "ამერიკელების მხრიდან წესრიგის დამყარებაზეც" საუბრობს და აღნიშნავს, რომ ისინი მუშაობას იწყებენ "ოპოზიციის მხარდასაჭერად" და "ქართული ოცნების პოზიციისთვის ძირის გამოსათხრელად". მას მიაჩნია, რომ მსგავსი ნაბიჯებისკენ აშშ ევროპელ პარტნიორებსაც განაწყობს.