დღეს დილით კომპანია მოსაკ ფონსეკას ორი პარტნიორი დააკავეს, გამოცემა Business Standard-ზე დაყრდნობით წერს გამომძიებელ ჟურნალისტთა გაერთიანება. მოსაკ ფონსეკა პანამური იურიდიული კომპანიაა, რომელიც გასულ წელს ე.წ. პანამის დოკუმენტების სკანდალში გაეხვა.

კომპანიის პარტნიორებს, რამონ ფონსეკა მორასა და იურგენ მოსსაკს პანამის ხელისუფლება კორუფციაში ადანაშაულებს.

ჟურნალისტებისთვის გასულ ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ოფშორულ ზონებს ფულის გასათეთრებლად და გადასახადებისგან თავის ასარიდებლად.

გამოჟონილი დოკუმენტების რაოდენობა კოლოსალურია. იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.

პანამის დოკუმენტები უპრეცედენტო ჟურნალისტური გამოძიებაა. გამომძიებელ ჟურნალისტთა საერთაშორისო კონსორციუმი (ICIJ) გერმანულ გაზეთ Suddeutsche Zeitung-თან, OCCRP–სა და სხვა 100-ზე მეტ მედია-პარტნიორთან ერთად, ერთი წლის განმავლობაში ამუშავებდა დოკუმენტებს, რათა გამოეაშკარავებინა მსოფლიოს პოლიტიკურ ლიდერთა კავშირები ოფშორულ ჰოლდინგებთან, გლობალურ სკანდალებთან, მათი ფარული ფინანსური ოპერაციები თაღლითებთან, ნარკომოვაჭრეებთან, მილიარდელებთან და ვარსკვლავ სპორტსმენებთანაც კი.

პანამის დოკუმენტებში აღმოჩნდა ინფორმაცია ალიევების ოჯახის, პუტინის გარემოცვის, ისლანდიის პრემიერის და სხვა სახელმწიფო ლიდერების ფინანსების შესახებ. პანამის დოკუმენტებში არაერთი ქართველის სახელიც გამოჩნდა, მათ შორის ბიძინა ივანიშვილის.