საგამოძიებო ჟურნალისტების საერთაშორისო კონსორციუმის ლიტვურმა პარტნიორმა 15min.lt-ის ცნობით, პუტინის მეგობრის, სერგეი როლდუგინის კომპანიები ფინანსურ საქმიანობას ლიტვური ბანკების გავლით აწარმოებდნენ.

აღნიშნული ინფორმაცია დაადასტურა ლიტვის ფინანსური დანაშაულის წინააღმდეგ ბრძოლის სააგენტომ.

"ფული ლიტვაში არ დარჩენილა, ლიტვა ერთგვარი გამტარის როლს ასრულებდა." - განცხადა სააგენტოს ხელმძღვანელმა, კესტუტის ჯუცევიკუსმა.

როლდუგინის თანხები Ūkio Bankas-ის გავლით გადიოდა ოფშორიდან. ეს ბანკი სერგეი მაგნიტსკის საქმეშიც ფიგურირებდა, 2013 წელს მისმა მმართველებმა, ფინანსური სირთულეების გამო Ūkio Bankas-ი დახურეს, ხოლო მისი მფლობელი ვლადიმერ რომანოვი რუსეთში გაიქცა, სადაც პოლიტიკური თავშესაფარი მიიღო.

თანხები, რომლებიც ლიტვის გავლით სხვადასხვა გარიგებებისთვის გამოიყენებოდა ოთხი ოფშორული კომპანიიდან მოდიოდა:

  • Dino Capital S.A. - პანამა.
  • Starcourt Worldwide Ltd. - ბელიზი.
  • Delco Networks S.A. - ბრიტანული ვირჯინიის კუნძულები.
  • Kentway S.A. - ბრიტანული ვირჯინიის კუნძულები.

როლდუგინის თანხები როსნეფტის, მსხვილი რუსული სახელმწიფო ნავთობის კომპანიის, აქციების ყიდვა-გაყიდვის ოპერაციაში ფიგურირებს. მოსაკ ფონსეკადან გაჟონილი დოკუმენტების მიხედვით, Starcourt Worldwide-სა და Dino Capital-თან გაფორმებული ხელშეკრულებები ორი კვირის მერე გაუქმდა და გარიგებაში მონაწილე მეორე მხარეს როლდუგინის კომპანიებისთვის მილიონ-ნახევარზე აშშ დოლარზე მეტი თანხის გადახდა დაეკისრა.

ლიტვის ფინანსური დანაშაულის წინააღმდეგ ბრძოლის სააგენტოს დასკვნით, აღნიშნული ოპერაცია ფულის გათეთრებას ჰგავს, თუმცა უფრო დეტალურად ამ საკითხზე საუბარი შეუძლებელია, რადგან ოპერაციაში მიმოქცეული თანხები მალევე გაიტანეს ლიტვის იურისდიქციიდან.

მოსაკ ფონსეკადან გაჟონილ დოკუმენტებში, პუტინის უახლოეს წრეს ოფშორულ კომპანიებში $2 მილიარდი აშშ დოლარი აღმოუჩინეს.

მსოფლიოს 400-მდე ჟურნალისტისთვის ანონიმური წყაროს მიერ ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად.