პანამის დოკუმენტებში აზერბაიჯანის პრეზიდენტის, ილჰამ ალიევის ოჯახის წევრები და აზერბაიჯანის მთავრობის მაღალი თანამდებობის პირებიც აღმოაჩინეს.

დოკუმენტების მიხედვით, პრეზიდენტის მეუღლე მეჰრიბან ალიევა 2005 წელს ერთ-ერთი ოფშორული კომპანიის მენეჯერი იყო, რომელიც აზერბაიჯანულ კონგლომერატ AtaHolding-ს მართავდა. ატაჰოლდინგი 2003 წელს დაარსდა და აზერბაიჯანში რამდენიმე მსხვილ ბიზნესს ფლობს, ბანკს, სადაზღვეო კომპანიას, სასტუმროების ქსელს, IT კომპანიას, ტურისტულ კომპანიას და ა.შ.

გაჟონილ დოკუმენტებში ალიევის სამი შვილი და აზერბაიჯანის საგადასახადო სტრუქტურების სამი ჩინოვნიკიც სახელდებიან, როგორც კომპანიის ბენიფიციარები.

აღნიშნულს გამოეხმაურა აზერბაიჯანის პრეზიდენტის პრეს-სამსახური:

"[პრეზიდენტ ალიევის] შვილები აზერბაიჯანის სრულწლოვანი მოქალაქეები არიან. მათ აქვთ უფლება ჰქონდეთ საკუთარი ბიზნესები. ეს კანონს არ ეწინააღმდეგება."

ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად. გამოჟონილი დოკუმენტების რაოდენობა კოლოსალურია.

იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.