შაჰინის სახელობის სკოლა-ლიცეუმის დირექტორი განათლების ხარისხის განვითარების ეროვნული ცენტრის მიერ დღეს გავრცელებულ განცხადებას გამოეხმაურა. დირექტორის განმარტებით, აღნიშნული განცხადება სკოლისთვის ავტორიზაციის გაუქმების თაობაზე არ შეესაბამება სიმართლეს.

ცენტრის განცხადებაში ვკითხულობთ, რომ 2015 წლის 4 სექტემბერს გამართულ ავტორიზაციის საბჭოს სხდომაზე, სკოლას განემარტა, რომ არ ჰქონდა უფლება ქართულენოვანი სექტორის პარალელურად, სწავლება განეხორციელებინა თურქულენოვან სექტორზე:

"თურქულენოვანი სექტორი არ ფუნქციონირებდა კანონმდებლობით დადგენილი წესით და სკოლას ის უნდა გაეუქმებინა."

დირექტორის განცხადებით, ავტორიზაციის საბჭოს სხდომაზე, დირექციამ გამოთქვა მზადყოფნა თურქულენოვანი სექტორის გაუქმების თაობაზე, რის შემდეგაც ავტორიზაციის საბჭოს გადაწყვეტილებით შპს შაჰინის სკოლა-ლიცეუმს მიენიჭა ავტორიზაცია 5 წლის ვადით.

დირექტორის ცნობით, სკოლამ ვადების დაცვით გადაიყვანა მოსწავლეები მოსწავლეთა საინფორმაციო სისტემაში არსებული თურქული სექტორის ბაზიდან ქართული სექტორის ბაზაში და გაზარდა ქართული ენის საათები.

ცენტრის განცხადებით, მონიტორინგმა დაადგინა, რომ სკოლის დირექტორის 2015 წლის 5 ოქტომბრის ბრძანებით, ავტომატურ რეჟიმში განხორციელდა თურქულენოვანი სექტორიდან, უცხო ქვეყნის 82 მოქალაქის გადაყვანა ქართულენოვან პარალელურ კლასებში. მონიტორინგმა, ასევე, გაარკვია, რომ გადაყვანამდე არ მომხდარა არც მათი განათლების აღიარება და არც ექსტერნის წესით მათი მზაობის დადგენა ზოგადი განათლების ცალკეულ კლასებში სწავლებისათვის.

დირექტორის თქმით, მონიტორინგის დასკვნაში აღნიშნული გარემოება, თითქოს სკოლამ დაარღვია "საქართველოში გაცემული საგანმანათლებლო დოკუმენტების ნამდვილობის დადასტურებისა და უცხოეთში მიღებული განათლების აღიარების წესისა და საფასურების დამტკიცების შესახებ" ბრძანება უსაფუძვლოა:

"აღნიშნული ბრძანება არ არეგულირებს მოქმედი ზოგადსაგანმანათლებლო დაწესებულების შიგნით, ერთი კლასის დახურვის შედეგად მეორე კლაში (პარალელურ კლასში) მოსწავლის გადაყვანისას ამ მოსწავლეთა განათლების აღიარების ვალდებულებას და შესაბამისად, არც განათლების აღიარების წესს ადგენს."

დირექტორის ცნობით, ტყუილია, რომ 2016-2017 სასწავლო წლისათვის სკოლაში ჩამოყალიბდა ჯგუფი, რომელიც ადგენდა თურქულენოვანი კლასებიდან ქართულენოვან კლასებში გადმოსული თითოეული მოსწავლის ცოდნის შესაბამისობას ეროვნულ სასწავლო გეგმასთან და ქმნიდა ინდივიდუალურ სასწავლო გეგმებს. ხოლო საზღვარგარეთიდან ჩამოსული მოსწავლეები კანონის შესაბამისად ჩაირიცხნენ, უცხოეთში მიღებული განათლების აღიარების საფუძველზე.

დირექტორის განცხადებით, ტყუილია ისიც, რომ მოსწავლეები ხანგრძლივი დროის განმავლობაში არ ცხადდებოდნენ სკოლაში. მისივე თქმით, თურქულენოვანი სექტორის გაუქმების შემდეგ არ დაფიქსირებულა მოსწავლეების მიერ გაკვეთილების მასიური გაცდენების ფაქტები:

"ახალი სასწავლო წლის დასაწყისში სკოლაში დარეგისტრირებული არაქართულენოვანი მოსწავლეებიდან მხოლოდ 5 არ ცხადდებოდა სკოლაში. სკოლის ადმინისტრაცია ამ მოსწავლეების სტატუსის შესაჩერებლად ელოდებოდა კანონით გათვალისწინებულ 90 დღიან ვადას, რომელიც იწურებოდა 2017 წლის 8 თებერვალს."

"განსაკუთრებით აღმაშფოთებელია, ცენტრის მიერ გამოქვეყნებული განცხადების ის ადგილი, სადაც მითითებულია, თითქოს სკოლა წლების განმავლობაში სარგებლობდა მოსწავლეებზე გაცემული ვაუჩერული დაფინანსებით. 2017 წლის 3 თებერვალს ცენტრში ჩატარებული ავტორიზაციის საბჭოს სხდომაზე ჩვენც და დამსწრე საზოგადოებამაც ერთად მოვისმინეთ ცენტრის მიერ განათლების მართვის საინფორმაციო სისტემაში მიწერილი წერილის პასუხი, სადაც მითითებულია, რომ ამ მოსწავლეებისათვის არანაირი ვაუჩერული დაფინანსება არ ყოფილა," - წერია შაჰინის სახელობის სკოლის დირექტორის განცხადებაში.