ქალი, რომელმაც ჩხოროწყუს ერთ-ერთი საჯარო სკოლის მოსწავლეები მერიის შენობაში წაიყვანა და საპირფარეშოები დაასუფთავებინა, ამბობს, რომ უნდოდა "მარცვალი ჩაედო" და ეჩვენებინა ბავშვებისთვის, რომ არცერთი სამუშაო სათაკილო არ არის. ამის შესახებ მან ტელეკომპანია იმედის ეთერში ისაუბრა. მისი მტკიცებით, მას "ასე მოუნდა" და მისი სურვილით, სკოლის დირექტორთან შეთანხმების შემდეგ წაიყვანა მოსწავლეები იქ.

"შევუთანხმდი სკოლის დირექტორს, მშობლებთან დარეკილი იყო. გამოვიყვანე ეს ბავშვები, მოვიყვანე მერიაში, მინდოდა მარცვალი ჩამედო, რომ არცერთი სამუშაო არ არის სათაკილო. ეს იყო ნება ჩემი, რაღაც შინაგანად მოდიოდა, არც აპარატის უფროსმა იცოდა და არც დაცვამ. დაცვაც უხერხულობაში ჩავაყენე. არც ჩვენი ცენტრის დიექტორმა [არ იცოდა]. აი, ასე მომინდა. მე არ მითქვამს ტუალეტში შესვლა, მე მინდოდა საჩვენებელი გამეკეთებინა. უბრალოდ მომეწმინდა ეგ ამბავი, რომ არ არის დასაძრახი. ეგ იყო და ეგ, მეტი აქ ფილოსოფია არ იყო ჩადებული", — განაცხადა ეთერ ჯაფარიძემ.

მისი თქმით, დასანანი აქ არაფერი არ არის და როცა ბავშვები გაიზრდებიან, მიხვდებიან, რომ მათ სიკეთე გაუკეთა.

რამდენიმე დღის წინ ჩხოროწყუს ერთ-ერთი საჯარო სკოლის მოსწავლეებს ადგილობრივი მერიის შენობაში გაწმენდითი სამუშაოები ჩაატარებინეს. როგორც სოციალურ ქსელში გავრცელებულ ვიდეოში ჩანს, ბავშვები საპირფარეშოს ასუფთავებენ. ჩხოროწყუს მერმა, დავით გოგუამ On.ge-ს აღნიშნული ფაქტი დაუდასტურა. მან გვითხრა, რომ ბავშვები ნამდვილად იყვნენ შენობაში და სხვადასხვა გაწმენდით სამუშაოს აწარმოებდნენ. გოგუას განცხადებით, "უმკაცრესად დაისჯება ყველა", ვინც შემხებლობაში იყო ამბავთან.

განათლების სამინისტროში აცხადებენ, რომ უწყების შიდა აუდიტის დეპარტამენტმა ფაქტის იდენტიფიცირებისთანავე დაიწყო მოკვლევა. მომხდარზე გამოძიება დაიწყო შინაგან საქმეთა სამინისტრომაც. შშს-ში ამბობენ, რომ გამოძიება სისხლის სამართლის კოდექსის 150-ე მუხლით დაიწყო, რაც იძულებას გულისხმობს