უკვე დანამდვილებით შეიძლება თქვა, რომ ამ ომს ნამდვილად ჰყავს ორი დამარცხებული, ეს არის უკრაინა და ევროკავშირი, — ამის შესახებ "ოცნების" პარლამენტის თავმჯდომარემ შალვა პაპუაშვილმა ბრიფინგზე განაცხადა. მისივე თქმით, "ერთი სექტორი ნამდვილად იქნება გამარჯვებული — ეს არის საფინანსო სექტორი, რომლისგანაც 90 მილიარდ ევროს ახლა ევროკავშირი ისესხებს".

"ჯერ შეუძლებელია თქვა ვინმე თუ იქნება ამ ომის გამარჯვებული, თუმცა უკვე დანამდვილებით შეიძლება თქვა, რომ ამ ომს ნამდვილად ჰყავს ორი დამარცხებული, ეს არის უკრაინა და ევროკავშირი. უკრაინა, რომელსაც უწევს ახლა გადაწყვეტილების მიღება საკუთარი ტერიტორიების დაკარგვის დე-ფაქტო აღიარებაზე, რომელმაც ასობით ათასი საკუთარი მოქალაქე დაკარგა ამ 4 წლის განმავლობაში, დაღვარა სისხლი, დაინგრა ეკონომიკა და უწევს ტერიტორიების დათმობის დეფაქტო ფიქრი და. მეორე - ევროკავშირი, რომელსაც უკრაინის ფინანსური დახმარების და უკრაინის სამხედრო დახმარების ფინანსური უზრუნველყოფის ტვირთი ახლა საკუთარ მხრებზე აკიდეს. ამ ყველაფრისთვის, წუხანდელი გადაწყვეტილებით, ევროკავშირი იღებს სესხს და ამ სესხით აძლევს კიდევ სესხს უკრაინას. ის სასესხო ვალდებულებაში არის, ევროკავშირის ეკონომიკური ზრდა ნულის გარშემო ტრიალებს და შიდაპოლიტიკურად როგორი დაძაბულობა აქვთ, ამასაც ვხედავთ. ასე რომ, იკვეთება რომ ჯერ რთულია თქმა, ეყოლება თუ არა ამ ომს საერთოდ გამარჯვებული, თუმცა დამარცხებულები გამოკვეთილი არიან უკრაინისა და ევროკავშირის სახით.

...მე კი ვთქვი, რომ გამარჯვებული ეყოლება თუ არა ომს, ჯერ არ ჩანს-თქო, თუმცა ერთი სექტორი ნამდვილად იქნება გამარჯვებული — ეს არის საფინანსო სექტორი, რომლისგანაც 90 მილიარდ ევროს ახლა ევროკავშირი ისესხებს. ამ საფინანსო სექტორში ვინ არიან წამყვანი კომპანიები, მგონი, ყველასთვის ძალიან კარგად არის ცნობილი", — განაცხადა პაპუაშვილმა.