ოცნების პარლამენტის თავმჯდომარე შალვა პაპუაშვილი გაფართოების საკითხებში ევროკომისარ მარტა კოსზე დასმული კითხვის საპასუხოდ ამბობს, რომ "წარმოდგენა არ აქვს ქალბატონ კოსს, რა უნდა ქართველ ხალხს, გაგნებაში არ არის, რა უნდა ქართველ ხალხს".

"ეს ის მარტა კოსია, რომლის პარტია ALDE თანამშრომლობს ტერორისტთან. მანამ, სანამ ALDE და ქალბატონი კოსი არ გაემიჯნებიან ტერორისტს, მანამდე მათი ყველა სიტყვა არის არასერიოზული. დღემდე ALDE არის პარტია, რომელიც თანამშრომლობს ტერორისტთან და რომლის თანამებრძოლიც არის ტერორისტი. ასე რომ, როდესაც ჩვენ საქმე გვაქვს ევროკომისართან, რომელიც არის ტერორისტთან მოთანამშრომლე პარტიის წევრი, აქ სერიოზულად ამ საკითხს ვერ განვიხილავთ. ეს ერთი, ახლა მეორე.

ერთი წითელი ხაზი, რომელიც ქართველმა ხალხმა კიდევ ერთხელ უნდა დავანახოთ ბრიუსელს, ეს არის მეურვეობითი დამოკიდებულების მცდელობა, რომელიც მათ აქვთ საქართველოს მიმართ. ქალბატონი კოსის განცხადებაშიც იყო, რომ "საქართველოს ხელისუფლებამ უნდა უსმინოს ქართველ ხალხს".

მე რამდენადაც ვიცი, ერთადერთი შემთხვევა, როდესაც მარტა კოსი საქართველოში იმყოფებოდა, ჩვენ თავზე რომ გადაგვიფრინა და სომხეთსა და ბაქოში რომ ჩავიდა. რამდენადაც ვიცი, ის ოფიციალურად ნამყოფი არ არის საქართველოში. იმის თქმა მინდა, რომ წარმოდგენა არ აქვს ქალბატონ კოსს, რა უნდა ქართველ ხალხს, გაგნებაში არ არის, რა უნდა ქართველ ხალხს.

როდესაც ბრიუსელის ბიუროკრატი თავს აძლევს იმის უფლებას, რომ ამგვარი მორალური პედესტალიდან და მეურვეობითი დამოკიდებულებით ისაუბროს ქართველი ხალხის ხელისუფლებასთან, ეს არის ქართველი ხალხის უპატივცემულობა, ჩვენი ნაკლები ხარისხის ადამიანებად ჩათვლა, რომ თითქოს ჩვენ ქართველებს არ შეგვიძლია ჩვენი თავის მართვა, ჩვენი ხელისუფლების არჩევა და ჩვენი ინტერესების წარმომადგენლების ყოლა ხელისუფლებაში. ეს არის ყველაზე სახიფათო გზა, რომელსაც ადგას ევროპული ბიუროკრატია. რამდენჯერმე მე ამაზე ვისაუბრე, თუმცა ვატყობ, რომ არ ყოფნის ეს ყველაფერი და მაინც აგრძელებენ ამ მიმართვას, ამიტომაც მე დღეიდან ამ საკითხზე განსაკუთრებულ ყურადღებას გავამახვილებ. ყველა უცხოელი, ვინც ლაპარაკობს ქართველი ხალხის სახელით, არ არის ქართველი ხალხის მეგობარი, ის არის ადამიანი, ვინც ფიქრობს, რომ ქართველი ხალხი მასზე ნაკლებია რაღაცით. იმავე რაოდენობის ხალხი, როგორც 2012-ში, 2020-ში, 2024-ში, დაუჭირა მხარი "ქართულ ოცნებას" თვითმმართველობის არჩევნებზე და მხარი დაგვიჭირა და რას ამბობს ქალბატონი კოსი, რომ ეს ხალხი ხალხი არ არის? რაიმე ქვეადამიანები არიან? რაიმე მაღალი კასტის წარმომადგენლები გველაპარაკებიან დაბალი კასტის წარმომადგენლებს? ყველა უცხოელმა დაანებოს თავი ქართველი ხალხის ნაცვლად და ქართველი ხალხის სახელით საუბარს! არც ერთ ქართველს არ მიუცია მისთვის, არც ლეგიტიმაცია, არც უფლება, ისაუბრონ ქართველი ხალხის სახელით და ესაუბრონ ქართველი ხალხის მიერ არჩეულ ხელისუფლებას ქართველი ხალხის სახელით. ასე მოსაუბრე ევროპა სხვა ხალხებს რომ ესაუბრებოდა მათი სახელით და მეურვეობითი დამოკიდებულება რომ ჰქონდა, რომ მათ უკეთ იცოდნენ, როგორ იყო სხვა ხალხების ინტერესები, ასეთი ევროპა არსებობდა, უბრალოდ არსებობდა 100 წლის წინ, 150 წლის წინ, 200 წლის წინ და აქეთ ნუ მიაქანებენ. იმდენს ნუ იზამენ, რომ საბჭოთა კავშირს გადაასწრონ და დაუბრუნდნენ იმ ევროპას, რომელიც სხვა ხალხების სახელით საუბრობდა და თავს უფლებას აძლევდა, ჩასულიყო სხვა ხალხებთან და ჭკუა ესწავლებინა მათთვის. დღეიდან კომისარი იქნება, რომელიმე ქვეყნის წარმომადგენელი იქნება, რომელიც გაბედავს, რომ ისაუბროს ქართველი ხალხის ნაცვლად, მისი სახელით, იქნება წითელი ხაზი და დღეიდან ყველას მივუთითებთ, რომ ეს არის ჩვენი სუვერენიტეტის უპატივცემულობა, ჩვენი დამოუკიდებლობის უპატივცემულობა. ქალბატონი კოსის ეს ერთი ფრაზა, რომ ხელისუფლებამ ხალხს უსმინოსო, ეს ნიშნავს, რომ გვაუქმებენ როგორც დამოუკიდებელ ქვეყანას, როგორც ერს, როგორც სახელმწიფოს, როგორც ხალხს, რომელსაც აქვს თავისი სუვერენიტეტი, რომელმაც იბრძოლა ამ თავისი სუვერენიტეტისთვის, ამიტომ ჩვენ ამის უფლებას არავის არ მივცემთ! შეეშვან ამ დამოკიდებულებას, რომ ვიღაც არის ზეკაცი და ვიღაც ქვეკაცია!", — განაცხადა ოცნების პარლამენტის თავმჯდომარემ, შალვა პაპუაშვილმა გაფართოების საკითხებში ევროკომისარ მარტა კოსზე დასმული კითხვის საპასუხოდ.

ცნობისთვის, მარტა კოსმა იმედი გამოთქვა, რომ "ხალხის მხარდაჭერით საქართველოს ხელისუფლება, მთავრობა დაუბრუნდება ევროპულ გეზს, თუმცა ეს მათ ხელშია".

"გადაწყვეტილებას მიიღებს საბჭო, ამიტომ არ შემიძლია ვისაუბროო ამის შესახებ. მაგრამ თქვენ იცით ევროკომისიის გაფართოების ანგარიში რეკომენდაცია და დასკვნა საქართველოსთან დაკავშირებით. ამ ანგარიშში ჩვენ ვამბობთ, რომ საქართველოს აქვს ისეთი დემოკრატიული უკუსვლა, როგორიც არც ერთ ქვეყანას არ ჰქონია. თუ ქვეყანას უნდა გააგრძელოს ევროპული გზა, ისინი განსხვავებულად უნდა მოიქცნენ, ეს რაც შეეხება მთავრობას, რა თქმა უნდა ჩვენ გავაგრძელებთ სამოქალაქო საზოგადოებისა და დამოუკიდებელი მედიის დახმარებას, რადგან ეს ძალიან მნიშვნელოვანია, არა მხოლოდ იმედის მომცემია, არამედ მნიშვნელოვანია ვუთხრათ მთავრობას, რომ არასწორია მხედველობაში არ მიიღო ის, რაც ხალხს სურს. მე ძალიან ვიმედოვნებ, რომ საქართველოს მთავრობა დაუბრუნდება ევროპულ გზას, ეს მათ ხელშია", – ამის შესახებ გაფართოების საკითხებში ევროკომისარმა, მარტა კოსმა ევროკავშირის საგარეო საქმეთა მინისტრების შეხვედრის დაწყებამდე "ევროსკოპს" უთხრა.