ოცნების პარლამენტის თავმჯდომარემ, შალვა პაპუაშვილმა დღეს გამართულ ბრიფინგზე განაცხადა, რომ "საკუთარი ფულის დახარჯვაც არ უნდა ბრიუსელს იმისთვის, რომ აღადგინოს უკრაინა და ფიქრობენ რუსეთს და ფიზიკურ პირებს რა წაართვან".

"2022 წლის აპრილში, პარაფირებული იყო შეთანხმება უკრაინასა და რუსეთს შორის, სტამბულის შეთანხმებად ცნობილი და გახსოვთ თქვენ, რომ დავით არახამიამ, რომელიც მაშინ ხელმძღვანელობდა უკრაინის მომლაპარაკებელთა ჯგუფს განაცხადა, რომ ის პირობები იყო უკრაინისთვის მისაღები, იმ შეთანხმების პარაფირება მოხდა, თუმცა შემდეგ ჩავიდა ბორის ჯონსონი, ევროპელების, ბრიტანეთის თუ ვისი სახელითაც ჩავიდა და პირდაპირ უთხრა, არანაირი შეთანხმება, მოდი ვიბრძოლოთ. ოთხი წელი გადის ფაქტობრივად უკვე, ამის შემდეგ რაც ბორის ჯონსონის იქ ჩასვლით ჩაიშალა სამშვიდობო შეთანხმება და დღეს საუბარია შესაძლოა უარეს შეთანხმებაზე. ყოველ შემთხვევაში, იმ შეთანხმებაზე უკეთესი, ფაქტია რომ ის ვარიანტები, რაც განიხილება და გარეთ გამოდის, არცერთი არ არის. უფრო მეტიც, იმ შეთანხმებაში საუბარი იყო, რომ მაგალითად ყირიმის საკითხი გადაიწევდა 10-15 წლით და იქნებოდა საერთაშორისო დისკუსიის ნაწილი. იმ შეთანხმებაში, რომელიც რატიფიცირებული იყო ჯერ კიდევ 2022 წლის აპრილში, ეწერა რომ დომბასის და ამ რეგიონის საკითხები გაიყინებოდა და გადაწყდებოდა. დღეს აღარ არის ამაზე საუბარი. ხედავთ, რომ პირდაპირ მოთხოვნაა დათმოს და უკრაინამ აღიაროს დე-ფაქტო გადასვლა რუსეთის კონტროლის ქვეშ.

4 წელი გადის უკვე ამის შემდეგ, რაც ჩაშალეს სამშვიდობო შეთანხმება. დღეს ყოველ შემთხვევაში, უარესი თუ არ იქნება, იმაზე უკეთესი პირობების შეთანხმება არ არის. ამასობაში ასობით ათასი ადამიანი დაიღუპა, სამხედრო და მშვიდობიანი მოქალაქეები. დღეს, როცა უკრაინას ეუბნებოდნენ, რომ ბოლომდე თქვენთან ვართ, ჩვენ ვიქნებით თქვენს გვერდით ბოლომდე, დღეს ბრიუსელი დგას და უყურებს იმას, ფული საიდან მოიტანოს, საკუთარი ფულის დახარჯვაც არ უნდა ბრიუსელს იმისთვის რომ აღადგინოს უკრაინა და ფიქრობენ ახლა იქ რუსეთს რა წაართვან, ფიზიკურ პირებს რა წაართვან, იქ აბრამოვიჩზე იყო საუბარი, ასე შემდეგ, აქეთ-იქით იყურებიან. თავისი ფულის დახარჯვა ხომ არ უნდათ. საქმე იმაშია, რომ ვხედავთ, ამას აქვს საერთაშორისო სამართლებრივი პრობლემა, ასეთ ნაბიჯს, იმიტომაც ვერ იღებენ ამ გადაწყვეტილებას და ამ გადაწყვეტილებას თუ არ იღებენ, გეგმა B რა არის, თუ რუსეთის სუვერენულ აქტივებს ხელს ვერ ადებენ", — თქვა შალვა პაპუაშვილმა.