დიდმა ბრიტანეთმა სანქციები დაუწესა რუსულ ნავთობკომპანიას "რუსნეფტს", რომელიც ყულევის ნავთობგადამამუშავებელ ქარხანას ამარაგებს.

შეგახსენებთ, რომ რუსულმა კომპანია "რუსნეფტმა" (RNFT.MM) მიმდინარე წლის ოქტომბერში ნავთობის პირველი ტვირთი მიაწოდა საქართველოში ახლად აშენებულ ყულევის ნავთობგადამამუშავებელ ქარხანას. ტანკერმა KAYSERI-მა 6 ოქტომბერს რუსეთის შავი ზღვის პორტ ნოვოროსიისკიდან ყულევის ნავთობტერმინალში 105,340 ტონა ნავთობი შემოიტანა. მაშინ ფინანსთა სამინისტროს შემოსავლების სამსახურის აცხადებდა, რომ ყულევის საზღვაო ნავსადგურში რუსეთის ფედერაციის პორტიდან შემოსულ, პანამის დროშის ქვეშ მცურავ თბომავალ KAYSER-ზე, გემის მფლობელ კომპანიასა და ტვირთის გამომგზავნ და მიმღებ კომპანიებზე საერთაშორისო სანქციები არ ვრცელდება.

"რუსნეფტის" გარდა, დიდმა ბრიტანეთმა დაასანქცირა კიდევ 3 რუსული ნავთობკომპანია: "ტატნეფტი", "რუსნეფტეგაზი" და "ნნკ-ოილი". ამის შესახებ დიდი ბრიტანეთის მთავრობის მიერ გამოქვეყნებულ შეტყობინებაშია ნათქვამია.

გარდა ამისა, ლონდონის შემზღუდავი ზომების ქვეშ მოექცნენ კომპანიები "ტექსტილ-სერვისი", "ფაბრიკა ვატა", არაბთა გაერთიანებულ საემიროებში დაფუძნებული "საფირა ენერჯი", "ფერგანას ქიმიური ქარხანა" და უზბეკური კომპანიები "გელიონ ბიზნეს ტრეიდი" და "ქიმია ინტერნეშენალი". სანქციების სიას ასევე დაემატა ხუთი ფიზიკური პირი.

რუსეთის ნავთობის ინდუსტრიის წინააღმდეგ სანქციების გამკაცრება მოჰყვა ოქტომბერში რუსული გიგანტების "ლუკოილისა" და "როსნეფტის" წინააღმდეგ დაწესებულ ზომებს. შეერთებულმა შტატებმა ასევე დააწესა სანქციები ამ მსხვილი ნავთობკომპანიების წინააღმდეგ.

ევროკავშირი აფართოებს სანქციებს რუსეთის "ჩრდილოვანი ფლოტის" წინააღმდეგ

იმავე დღეს, ევროკავშირმა შავ სიაში შეიყვანა კიდევ 41 ტანკერი რუსეთის ე.წ. "ჩრდილოვანი ფლოტიდან". ამით სანქციების ქვეშ მყოფი გემების საერთო რაოდენობა თითქმის 600-მდე იზრდება. ამ გემებს, რომლებიც სანქციების გვერდის ავლით რუსულ ნავთობს გადაჰყავთ, არ აქვთ უფლება შევიდნენ ევროკავშირის პორტებში ან გამოიყენონ ევროკავშირის ქვეყნებში არსებული საზღვაო ინფრასტრუქტურის სერვისები.

ეს ზომა მიღებულ იქნა ევროკავშირის სამიტის ფონზე, რომელიც ბრიუსელში 18 დეკემბერს დაიწყო და სადაც დაგეგმილია გადაწყვეტილების მიღება გაყინული რუსული აქტივების შესახებ. ევროკავშირის ლიდერები და მრავალი წევრი სახელმწიფო, მათ შორის გერმანია, მოუწოდებენ ევროკომისიის გეგმის მიღებისკენ, რომელიც ითვალისწინებს ევროკავშირში დაბლოკილი რუსული სახსრების გამოყენებას უკრაინისთვის "რეპარაციის სესხისთვის", ასევე ევროკავშირის სახელმწიფოების მხრიდან ეროვნული გარანტიების უზრუნველყოფას. თანხების რუსეთისთვის დაბრუნება მხოლოდ იმ შემთხვევაში იქნება შესაძლებელი, თუ ის ომის დასრულების შემდეგ უკრაინას რეპარაციებს გადაუხდის.