ჩვენი ყოველდღიური რუტინა ერთმანეთისგან განსხვავდება — ზოგი სამუშაო დღეს ადრე იწყებს, ზოგი სწავლას უთავსებს საქმეს, ზოგიც თავისუფალ გრაფიკზე მუშაობს. მიუხედავად ამ განსხვავებებისა, თითქმის ყველას გვაერთიანებს ერთი ჩვეულებრივი, მაგრამ მნიშვნელოვანი ნაწილი — პროდუქტების მაღაზიაში ყოველდღიური სტუმრობა.

ყოველდღიური მოხმარების პროდუქტების შერჩევისას ხშირად დიდ დროს ვუთმობთ გადაწყვეტილების მიღებას, რადგან ვადარებთ ფასს, ხარისხს, შემადგენლობას, ვაკვირდებით დეტალებს და, საბოლოოდ, მხოლოდ ამის შემდეგ ვიღებთ გადაწყვეტილებას. ზოგჯერ ეს პროცესი იმდენი ხანი გრძელდება ხოლმე, რომ ერთი შეხედვით მარტივ საქმეში საათებს ვკარგავთ.

სწორედ ამ მიდგომაზე ამახვილებს ყურადღებას თიბისის ახალი მასშტაბური კამპანია — შეადარე, სცადე, დაიმტკიცე — რომელიც მომხმარებლებს მოუწოდებს, სესხის აღებამდე სხვადასხვა ბანკის პირობები შეადარონ და გადაწყვეტილება მხოლოდ ამის შემდეგ მიიღონ.

როგორც, მარკეტერი, ანი ჭირაქაძე გვიყვება, კვლევებზე დაკვირვების შედეგად დადგინდა, რომ მომხმარებლებს ერთი საერთო ჩვევა ახასიათებთ — ისინი სესხის ასაღებად იმ ბანკს მიმართავენ, რომელშიც ხელფასი ერიცხებათ, რადგან არსებობს მოსაზრება, რომ სწორედ ის ბანკი სთავაზობს მათ უკეთეს პირობებს. თუმცა, ეს მოსაზრება ყოველთვის არ შეესაბამება სიმართლეს.

"ამ კამპანიით გვინდოდა ადამიანებისთვის მიგვენიშნებინა, რომ თუკი ყოველდღიური მოხმარების პროდუქტებს დაკვირვებით არჩევენ, ადარებენ ერთმანეთს და ისე იღებენ გადაწყვეტილებას, ეს ქცევა გადმოეტანათ სესხის აღების დროსაც, შეედარებინათ სხვადასხვა პირობები და ისე მიეღოთ გადაწყვეტილება",— ამბობს ანი ჭირაქაძე.

კამპანიის მთავარი მესიჯიც სწორედ ესაა — შეადარე, სცადე, დაიმტკიცე. როგორც ანი განმარტავს, ეს სლოგანი თიბისი ბანკის მთავარ სათქმელს ზუსტად ასახავს — რომ მომხმარებლებმა მიიღონ სწორი გადაწყვეტილება სესხის აღების პროცესში. კერძოდ, შეადარონ სხვადასხვა ბანკის პირობები, სცადონ თანხის ლიმიტის მოთხოვნა და სწორედ ამის შემდეგ დაიმტკიცონ სესხი მომენტალურად.

გარდა ამისა, კამპანიის მთავარი მიზანი იყო, რომ მესიჯი რეგიონებში მცხოვრებ მოსახლეობამდე მისულიყო. სწორედ ამიტომ შეირჩა კამპანიის ფოკუსად რეგიონების მთავარი ბაზრები/პროდუქტების მაღაზიები, რომლებშიც მოსახლეობა ყველაზე ხშირად იყრის თავს.

"ბაზარში ადამიანების ქცევა როგორია? ჩვენ დაკვირვებით და გულმოდგინებით ვარჩევთ სხვადასხვა პროდუქტს: ვადარებთ ერთმანეთს სხვადასხვა დახლზე მოთავსებულ პომიდორს, ვსინჯავთ თაფლს, ვტეხთ მწვანე ლობიოს, რომ არ ჰქონდეს ძარღვები და ა.შ", — განმარტავს ანი — "სწორედ ამ ქცევებზე მინიშნებით ვუთხარით მომხმარებლებს, რომ ასეთივე დაკვირვებით უნდა მიეღოთ სესხის აღების გადაწყვეტილებაც".

თუმცა, სწორი არჩევანის გაკეთებაში ხშირად ხელს გვიშლის ის სტერეოტიპები, რომლებიც რადიკალურად განსხვავდება რეალობისგან. კერძოდ, არ აქვს მნიშვნელობა სად გერიცხებათ ხელფასი, რადგან შესაძლებელია სხვა ბანკმა სესხის უკეთესი პირობები შემოგთავაზოთ. ამასთანავე, გაითვალისწინეთ, რომ შემოსავალი მხოლოდ ხელფასი არ არის, ის მოიცავს როგორც გზავნილებს, ისე აგრომეურნეობას, ვაჭრობასა და თვითდასაქმებას.

როგორც ანი განმარტავს, კამპანიის მთავარი გამოწვევა იყო ბალანსის პოვნა სიზუსტესა და სიმარტივეს შორის.

"ჩვენი მიზანი იყო, რომ მომხმარებლები არ დაგვებნია და მათთვის გასაგებ ენაზე მიგვეწოდებინა საჭირო ინფორმაცია სესხის სხვადასხვა დეტალის შესახებ. ეფექტური %, წინსწრების, გაცემის საკომისიოები და სხვა", — გვიყვება ის.

კამპანიის ფარგლებში განსაკუთრებული ყურადღება დაეთმო იმას, რომ ინფორმაცია არ ყოფილიყო გადატვირთული ტექნიკური ტერმინებით და მომხმარებელს რეალური სურათი დაენახა. მიზანი არ იყო მხოლოდ სესხის შეთავაზება, არამედ გადაწყვეტილების მიღების პროცესის გამარტივება და იმის ჩვენება, რომ სესხის აღებამდე მნიშვნელოვანია ასჯერ გაზომვა.

ანი ჭირაქაძის შეფასებით, კამპანია მომხმარებლებს აძლევს თავისუფლებას, რომ თავად შეაფასონ პირობები და იპოვონ მათთვის ხელსაყრელი პირობები.

"მთავარი მესიჯი — შეადარე, სცადე, დაიმტკიცე — ჩვენთვის ნიშნავს მომხმარებლისთვის თავისუფლებისა და ნდობის გამოცხადებას, რადგან ვამბობთ, რომ არაფერს ვმალავთ და მომხმარებელს ვაძლევთ არჩევანის უფლებას. ვაჩვენებთ, რომ პროცესი მარტივი და ხელმისაწვდომია, ვაძლევთ შესაძლებლობას, თავად დარწმუნდნენ გამოცდილებით, რომ პროდუქტი რეალურად მუშაობს მათთვის", — განმარტავს ის.

თიბისიში მიაჩნიათ, რომ მსგავსი მიდგომა გრძელვადიან პერსპექტივაში მომხმარებელთა ქცევაზე დადებითად აისახება და ფინანსური გადაწყვეტილებების მიღების პროცესს უფრო გააზრებულს გახდის.

კამპანიის მთავარი იდეაც სწორედ ამაზეა დაფუძნებული — ადამიანებმა ყოველდღიურ ცხოვრებაში დამკვიდრებული დაკვირვების ჩვევა ფინანსურ გადაწყვეტილებებზეც გადაიტანონ და სესხის აღებისას არ დასჯერდნენ პირველივე შეთავაზებას.

ამიტომ, ასჯერ გაზომეთ და ერთხელ გაჭერით — შეადარეთ, რომ დაგიმტკიცონ.