სლოვაკეთის პრემიერმინისტრი რობერტ ფიცო X-ზე წერს, რომ ბრიუსელში გამართული სამიტისთვის ჩასულ მის თვითმფრინავს ტრაპიანი ავტომობილი დაეჯახა, რის შემდეგაც ის ფრენისთვის უვარგისია.

რობერტ ფიცო მხოლოდ თვითმფრინავის ინციდენტის გამო არ არის უკმაყოფილო — მისი შეფასებით, ბრიუსელში შეხვედრაზე "სკეპტიკური განწყობა სუფევდა" და ორმაგი სტანდარტები "ევროპული პოლიტიკისთვის დამახასიათებელი მოვლენაა".

ფიცო აღნიშნავს, რომ სერბეთის პრეზიდენტის, ალექსანდარ ვუჩიჩის მიმართ მხარდაჭერა გამოხატა და სოლიდარობის მიზნით "სერბეთის წინააღმდეგ" გამართულ სამიტში მონაწილეობა არ მიიღო.

"ბრიუსელში გამართული სამიტი ცუდად დაიწყო. აეროპორტში ავტომობილი ჩვენს თვითმფრინავს შეეჯახა და ისე დააზიანა, რომ ის აღარ არის ფრენისთვის ვარგისი, რის გამოც იძულებულები ვართ, აქ დავტოვოთ.

მსგავსად სკეპტიკური განწყობა სუფევდა საღამოს შეხვედრაზეც დასავლეთ ბალკანეთის ქვეყნებთან, რომლებიც ევროკავშირის წევრობას ისწრაფვიან. მე განსაკუთრებული მხარდაჭერა გამოვხატე სერბეთის პრეზიდენტის, ალექსანდრ ვუჩიჩის მიმართ, რომელმაც შეგნებულად არ მიიღო მონაწილეობა ამ სამიტში, რათა გაეპროტესტებინა ევროკავშირის ინსტიტუტების მხრიდან სერბეთის მიმართ უსამართლო მოპყრობა.

სერბეთი სუვერენული ქვეყანაა და მისი პრეზიდენტი — სუვერენული პოლიტიკოსი, რაც ევროკავშირში ყოველთვის კარგად არ ითვლება. სერბეთს მუდმივად უყენებენ ახალ და ახალ პირობებს ევროკავშირში გაწევრიანებისთვის, რათა მისი მიღება რაც შეიძლება დიდხანს გადაიდოს, მიუხედავად იმისა, რომ სერბეთი ერთ-ერთი ყველაზე კარგად მომზადებული ქვეყანაა.

ორმაგი სტანდარტები ევროპული პოლიტიკისთვის დამახასიათებელი მოვლენაა. ერთი მხრივ, დიდი მოთამაშეები უკრაინას ევროკავშირში გაწევრიანებისკენ უბიძგებენ, მიუხედავად იმისა, რომ ქვეყანა აბსოლუტურად მოუმზადებელია; მეორე მხრივ კი სერბეთს კავშირში არ უშვებენ იმიტომ, რომ ის ზედმეტად ამაყი, თავდაჯერებული და სუვერენულია," — ვკითხულობთ განცხადებაში.

მეტი რობერტ ფიცოს შესახებ: