რუსული ანალიტიკური სააგენტო "ავტოსტატის" დირექტორმა, სერგეი ცელიკოვმა, თავის Telegram-არხზე გამოაქვეყნა სტატისტიკა, რომლის მიხედვითაც წლის დასაწყისიდან საქართველოდან რუსეთში 34 600 მეორადი მსუბუქი ავტომობილი გავიდა. მისი თქმით, ეს თითქმის სამჯერ (+218%) მეტია გასული წლის პირველი 11 თვის მაჩვენებელზე.

"ეხო კავკაზა" წერს, რომ ცელიკოვმა კიდევ ერთხელ დაადასტურა მედიაში ადრე გამოქვეყნებული მონაცემები, რომ საქართველოში მესამე ქვეყნებში (მათ შორის ყირგიზეთსა და ყაზახეთში) ექსპორტისთვის რეგისტრირებული ავტომობილები რეალურად იგზავნება რუსეთში დასავლეთის სანქციების გვერდის ავლით.

ცელიკოვის მიერ მოყვანილი მონაცემები საჯაროდ ხელმისაწვდომი არ არის; ის მიღებულია ოფიციალური ელექტრონული პასპორტების სისტემიდან. სააგენტო "ავტოსტატის" მონაცემებით, მიმდინარე წლის ნოემბერში საქართველოდან რუსეთში იმპორტირებულია 4,778 მეორადი მსუბუქი ავტომობილი (სამ წელზე მეტი ასაკის), რაც გასული წლის ნოემბერთან შედარებით 3.3-ჯერ (+227%) მეტია.

ყველაზე პოპულარული ბრენდებია BMW (926 მანქანა), Toyota (441), Volkswagen (414), Hyundai (373) და KIA (352). მოდელებს შორის წამყვანი პოზიციებია BMW X5 (279), Chevrolet Equinox (175) და BMW X7 (172). სტატისტიკა არ მოიცავს ახალ მანქანებს.

"ეხო კავკაზას" ცნობით, საქართველოს სტატისტიკის ეროვნული სამსახურის მონაცემები აჩვენებს, რომ იანვრიდან ოქტომბრამდე საქართველოდან რუსეთში მხოლოდ 8 მანქანაა ექსპორტირებული, რომელთა ღირებულება 139,300 აშშ დოლარია.

ოფიციალური მონაცემებით, წელს საქართველოდან ყირგიზეთში რეექსპორტის ღირებულებამ 1.1 მილიარდ აშშ დოლარს (35,225 მანქანა) გადააჭარბა, ხოლო ყაზახეთში — 639 მილიონ აშშ დოლარს (37,093 მანქანა).

2023 წელს საქართველომ აკრძალა მანქანების რეექსპორტი რუსეთსა და ბელარუსში, მაგრამ არ აკრძალა მანქანების რეგისტრაცია ამ ქვეყნების მოქალაქეების სახელზე. შედეგად, რუსებმა და ბელარუსებმა საქართველოში შეიძინეს მანქანები, დოკუმენტებში საბოლოო დანიშნულების ადგილად კი ყაზახეთი ან ყირგიზეთი მიუთითეს. შემდეგ მანქანები ლარსის საკონტროლო-გამშვები პუნქტის გავლით ექსპორტირდებოდა, თუმცა, მედიაში გავრცელებული ინფორმაციით, ისინი ხშირად რუსეთის ბაზარზე ხვდებოდა.