პენიტენციური სამსახური კოალიცია ცვლილებისთვის ლიდერის, ზურაბ ჯაფარიძის განცხადებას ეხმაურება. მათი განცხადებით, მსჯავრდებულებს გათავისუფლების საათებზე წინასწარ არ აფრთხილებენ და ზურაბ ჯაფარიძე "ცრუობს".

მას შემდეგ რაც ზურაბ ჯაფარიძემ ციხე დატოვა, ჟურნალისტებთან საუბრისას განაცხადა, რომ წინასწარი გაფრთხილებით მან იცოდა, რომ ციხეს 10:30 საათზე დატოვებდა, მაგრამ ის მოულოდნელად რამდენიმე საათით ადრე, 08:00-ზე გაათავისუფლეს და მოქალაქეების დახმარებით მოუწია რუსთავიდან თბილისში ჩამოსვლა.

სპეციალური პენიტენციური სამსახური ეხმაურება მსჯავრდებულ ზურაბ გირჩი ჯაფარიძის გათავისუფლებასთან დაკავშირებით გავრცელებულ სპეკულაციურ ინფორმაციას.

"კანონმდებლობა არ ითვალისწინებს მსჯავრდებულის წინასწარ ინფორმირებას ან/და მასთან რაიმე სახით შეთანხმებას გათავისუფლების კონკრეტული დროის შესახებ, შესაბამისად გაურკვეველია რას ეფუძნებოდა მსჯავრდებულის მოლოდინი იმასთან დაკავშირებით, რომ მას პენიტენციური დაწესებულება უნდა დაეტოვებინა 10:30 საათზე. ზურაბ ჯაფარიძის განცხადება, თითქოს მას რამდენიმე დღის წინ მიაწოდეს ინფორმაცია გათავისუფლების კონკრეტული დროის შესახებ, არის სიცრუე.

პენიტენციურ დაწესებულებაში, დაწესებულების დღის განრიგის შესაბამისად, მუშაობა იწყება 08:00 საათზე. მსჯავრდებული ზურაბ ჯაფარიძის გათავისუფლებასთან დაკავშირებული ფორმალური საკითხების მოგვარებას დასჭირდა მცირე დრო და ის გათავისუფლდა პენიტენციური კოდექსისა და დაწესებულების მოთხოვნების სრული დაცვით დაახლოებით 08:30 საათზე," — ვკითხულობთ განცხადებაში.

ზურაბ ჯაფარიძე 22 მაისს დააკავეს. მოსამართლე ჯვებე ნაჭყებიამ ოცნების პარლამენტის დროებით საგამოძიებო კომისიაზე გამოუცხადებლობისთვის მას 7-თვიანი პატიმრობა მიუსაჯა და 2 წლით საჯარო სამსახურში თანამდებობის დაკავება აუკრძალა. ზურაბ ჯაფარიძეს ბრალი სისხლის სამართლის კოდექსის 349-ე მუხლით წარუდგინეს, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.