საქართველოს პრეზიდენტმა, სალომე ზურაბიშვილმა, ბრიუსელში ვიზიტისას, ევროპარლამენტის პრეზიდენტს, დავიდ სასოლის ქართველი და ევროკავშირის ქვეყნების სტუდენტების სწავლის გადასახადის გათანაბრებაზე ესაუბრა. პრეზიდენტის ადმინისტრაციის გავრცელებულ განცხადებაში ვკითხულობთ, რომ ზურაბიშვილმა ევროპარლამენტის პრეზიდენტს სთხოვა, რეკომენდაცია გაუწიოს შესაბამის ინსტანციებში, რათა ქართველ სტუდენტებს ევროკავშირში სწავლისას ჰქონდეთ ისეთი ტარიფებით სარგებლობის უფლება, რომლითაც ევროკავშირის წევრი ქვეყნების სტუდენტები სარგებლობენ.

ზურაბიშვილისა და სასოლის საუბარი შეეხო კორონავირუსის საწინააღმდეგო ვაქცინასაც.

"პრეზიდენტმა აღნიშნა, რომ ევროკავშირს აკისრია, არა მხოლოდ მორალური და სიმბოლური, არამედ პოლიტიკური პასუხისმგებლობაც. პრეზიდენტის აღნიშნული პოზიცია გაიზიარა ევროპარლამენტის პრეზიდენტმა და ხაზი გაუსვა კოვიდსოლიდარობის მნიშვნელობას", — ვკითხულობთ განცხადებაში.

სალომე ზურაბიშვილმა ევროპარლამენტის პრეზიდენტი საქართველოში მოიწვია.

სალომე ზურაბიშვილი ბრიუსელში სამუშაო ვიზიტით 20 იანვარს გაემგზავრა. ვიზიტის ფარგლებში დაგეგმილი იყო შეხვედრები ევროკავშირისა და NATO-ს ხელმძღვანელ პირებთან.

გაიგეთ მეტი: