ევროკავშირში საქართველოს წარმომადგენელი ნატალი საბანაძე აცხადებს, რომ საქართველოს პრეზიდენტის, სალომე ზურაბიშვილის ერთ-ერთი გზავნილი ბრიუსელში ვიზიტისას იყო, რომ საჭიროა "მეტი ევროკავშირი", როგორც საქართველოში, ასევე, რეგიონში. მისივე თქმით, შეხვედრების დროს წამყვანი თემა იყო კორონავირუსი და კოვიდსოლიდარობაც.

"კიდევ ერთი, რა თქმა უნდა, მნიშვნელოვანი თემა იყო აღმოსავლეთ პარტნიორობის სამიტი, რომელიც დაგეგმილია. პრეზიდენტის გზავნილი იყო, რომ მეტი ყურადღება დაუთმონ სამ ასოცირებულ პარტნიორს, არა იმიტომ, რომ ჩვენ გვინდა რომელიმე პარტნიორის უკან ჩაჩოჩება, არამედ უბრალოდ იმიტომ, რომ მოცემულობა არის ასეთი — სამი ასოცირებული ქვეყანა ვთანხმდებით ინტერესებზე და ღირებულებებზე, ანუ ამ სამეულის თემაც იყო ხაზგასმული პრეზიდენტის მიერ. ასევე, რა თქმა უნდა, კონკრეტულად იყო განხილული საქართველოს გეგმები ინტეგრაციის მიმართულებით. ყველა შეხვედრაზე ნახსენები იყო 2024 და სურვილი, რომ გაკეთდეს განაცხადი", — განაცხადა მან.

მისივე განცხადებით, საუბარი იყო, ასევე, ქვეყნებს შორის სტუდენტების უფრო აქტიურ გაცვლაზე და იმაზე, რომ ქართველ სტუდენტებს მიეცეთ შესაძლებლობა ისწავლონ იგივე ტარიფებით, როგორც სწავლობენ ევროკავშირის მოქალაქეები.

სალომე ზურაბიშვილი ბრიუსელში სამუშაო ვიზიტით 20 იანვარს გაემგზავრა. ვიზიტის ფარგლებში დაგეგმილი იყო შეხვედრები ევროკავშირისა და NATO-ს ხელმძღვანელ პირებთან.