საქართველოს პრეზიდენტის ადმინისტრაციის განცხადებით, სალომე ზურაბიშვილმა ევროკავშირის უმაღლეს წარმომადგენელთან საგარეო საქმეთა და უსაფრთხოების პოლიტიკის საკითხებში, ჟოზეპ ბორელთან შეხვედრისას კონფლიქტების გადაწყვეტაში ევროკავშირის მეტი ჩართულობის საკითხი დააყენა. გარდა ამისა, პრეზიდენტმა ბორელი საქართველოში მოიწვია.

ზურაბიშვილმა უმაღლეს წარმომადგენელთან საქართველოს ოკუპირებულ რეგიონებში უსაფრთხოებისა და ჰუმანიტარული მდგომარეობის საკითხები განიხილა. როგორც ადმინისტრაციაში აცხადებენ, ჯოზეფ ბორელმა კვლავ დაადასტურა საქართველოს სუვერენიტეტისა და ტერიტორიული მთლიანობის მიმართ ევროკავშირის მტკიცე მხარდაჭერა.

შეხვედრისას ხაზი გაესვა ევროკავშირის მონიტორინგის მისიის მნიშვნელობას საქართველოში და ჟენევის მოლაპარაკებებს, რომლის ფარგლებშიც ევროკავშირს არა მხოლოდ მედიატორის, არამედ გარკვეულწილად გარანტორის როლიც აქვს.

"უმაღლესი წარმომადგენელი მიესალმა იმ მნიშვნელოვან პროგრესს, რაც საქართველომ ევროკავშირი-საქართველოს ასოცირების შესახებ შეთანხმების ვალდებულებების შესრულებისას მიაღწია, ასევე, აღმოსავლეთ პარტნიორობაში მიღწეული წინსვლისათვის", — ნათქვამია ადმინისტრაციის განცხადებაში.

სალომე ზურაბიშვილი ბრიუსელში სამუშაო ვიზიტით 20 იანვარს გაემგზავრა. ვიზიტის ფარგლებში დაგეგმილია შეხვედრები ევროკავშირისა და ANTO-ს ხელმძღვანელ პირებთან.