Facebook-ზე აღარ იძებნება აშშ-ის მოქმედი პრეზიდენტის, დონალდ ტრამპის ვიდეომიმართვა, რომელიც მან დაახლოებით 2 საათის წინ გაავრცელა. შესაძლოა, ტრამპმა ვიდეო თავად წაშალა, თუმცა მედია ვარაუდობს, რომ შინაარსის გამო ის ფეისბუქმა წაშალა.

ვიდეომიმართვაში დემონსტრანტებს, რომელთა ნაწილი კაპიტოლიუმში შეიჭრა, ტრამპმა "განსაკუთრებულები" უწოდა და უთხრა, რომ ისინი უყვარს, რაც ძალადობის წახალისებად შეფასდა. ტვიტერმა ამ ვიდეომიმართვაზე ინტერაქციის ფუნქცია შეზღუდა და ის ძალადობის რისკის შემცველად მონიშნა.

ეს პირველი შემთხვევა არ არის, როდესაც ტრამპის პოსტებზე ფეისბუქსა და ტვიტერს შესაბამისი რეაქცია აქვთ და მას მონიშვნას უკეთებენ.

ტრამპის ვიდეომიმართვას წინ უძღოდა არჩეული პრეზიდენტის, ჯო ბაიდენის გამოსვლა, რომელმაც ტრამპს მოუწოდა, ამომრჩევლებისთვის მიემართა.

ვაშინგტონში, კაპიტოლიუმთან მიმდინარე ტრამპის მხარდამჭერების აქცია დაპირისპირებაში გადაიზარდა. დემონსტრანტებმა ბარიერი გაარღვიეს და შენობაში შეიჭრნენ. კონგრესში ევაკუაცია გამოცხადდა, ქალაქში კი კომენდანტის საათი.

შეწყდა სხდომა, რომელზეც არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან მოქმედ პრეზიდენტს სჯერა, რომ მან გაიმარჯვა და არჩევნები გაყალბდა.

ამ ეტაპზე ვრცელდება ინფორმაცია ერთ დაჭრილ მოქალაქესა და რამდენიმე დაშავებულ პოლიციელზე.

გაიგეთ მეტი: