აშშ-ში, ფლორიდაში, კაცმა თავისი ლეკვი ალიგატორის ყბებიდან დაიხსნა — ის სასწრაფოდ წყალში ჩახტა და ქვეწარმავალს ეტაკა, თან პირიდან სიგარაც კი არ გაუგდია.

74 წლის რიჩარდ უილბენკსი თავის კინგ-ჩარლზ-სპანიელს, განერს, ასეირნებდა პატარა ტბის მახლობლად ფლორიდაში, როდესაც წყლიდან ალიგატორი ამოხტა, ძაღლს პირი სტაცა და წყალში წაათრია.

"წყლიდან ჭურვივით ამოხტა. ვერასდროს წარმოვიდგენდი, რომ ალიგატორი ასეთი სწრაფი იქნებოდა. ეს ძალიან ჩქარა მოხდა", — თქვა მან.

ინციდენტი ფლორიდის ველური ბუნების ფედერაციის კამერებმა დააფიქსირეს. ვიდეოში ვხედავთ, რომ უილბენკსი ტბორშია ჩამხტარი და მისი თავი წყალქვეშ ეშვება, როცა ალიგატორის მოხელთებას ცდილობს. შემდეგ ის წყლიდან ამოდის და ხელში ალიგატორი უჭირავს, რომელსაც საბრალო ლეკვი ჯერ კიდევ ყბებში ჰყავს მოქცეული. მთელი ამ დროის განმავლობაში კაცს პირში სიგარა აქვს და როგორღაც არ უვარდება.

უილბენკსი ტბორის ნაპირისკენ მიიწევს და ძაღლის გამოთავისუფლებას ცდილობს. საბოლოოდ ის ამას ახერხებს და განერი გარბის, შემდეგ კი მოხუცი კაცი ალიგატორის პირიდან თავისი ხელების გათავისუფლებას ცდილობს. აი, თავად იხილეთ ვიდეო:

შენიშვნა: ძაღლი ცოცხალი გადარჩა, თუმცა ვიდეო, შესაძლოა, თქვენთვის არასასიამოვნო სანახავი იყოს.

განერი ინციდენტის შემდეგ ვეტერინარმა შეამოწმა და, მართალია, მას ალიგატორთან ორთაბრძოლის დროს მუცელში პატარა ჭრილობა მიეყენა, მაგრამ სხვა მხრივ ის კარგადაა. აი, უილბენკსი კი ამბობს, რომ მისი ხელები "დაღეჭილია". თუმცა მას არ სურს, რომ ალიგატორს რამე დაუშავდეს:

"ისინი ბუნებისა და ჩვენი ცხოვრების ნაწილნი არიან", — თქვა მან.

თუმცა დღეიდან სეირნობისას განერი საბელზე და ტბორისგან მინიმუმ 3 მეტრის მოშორებით მაინც ეყოლება.