რუსეთის ინტერესი საქართველოს მიმართ ტერიტორიული დავით არ შემოიფარგლება. რა თქმა უნდა, საქართველოს საპარლამენტო არჩევნები რუსული მედიასაშუალებების გაშუქების არეალშიც მოხვდა და სხვადასხვა შეფასებაც დაიდო. ჰიმბრიდული ომის ერთ-ერთი კომპონენტი მედიით გადაცემული ინფორმაციით მანიპულაციას ეხება, რასაც რუსეთი ბოლო წლების განმავლობაში წარმატებით იყენებს.

რუსული გამოცემებისა და ტელევიზიების მრავალრიცხოვნების გამო, შევეცადეთ თვალი გვედევნებინა სამთავრობო და პროსახელისუფლებო მედიებისთვის და გამოგვევლინა ტენდენციები, თუ რაზე ამახვილებდნენ ყურადღებას.

ტელევიზია

რუსეთის საზოგადოებრივი მაუწყებლის, პერვი კანალის ეთერში საქართველოს არჩევნებს ერთადერთხელ დაეთმო დრო, 20-წამიანი კადრ-სინქრონის სახით, რომელშიც ქართული ოცნების გამარჯვებისა და ოპოზიციის პროტესტის გარდა არაფერი იყო ნათქვამი. საარჩევნო ამბები ვერ მოხვდა რასია 1-ის ეთერში, თუმცა აფხაზეთში მანდარის კრეფის სეზონზე დრო არ დანანებიათ.

ოპოზიციის პროტესტი გაშუქდა Russia Today-ში. აღსანიშნავია, რომ კრემლის მიერ კონტროლირებადი ტელევიზია ბალტიისპირეთის ქვეყნებში დაბლოკილია. ოპოზიციის დამარცხებაზე Russia Today-ს ცალკე სტატია აქვს მიძღვნილი, რომელიც მიხეილ სააკაშვილის მიერ საზოგადოების "რადიკალიზაციაზიის" მცდელობაზეა. გარდა ამისა, კრემლისტურ გამოცემასთან ორი ანალიტიკოსი ამტკიცებს, რომ ქართული ოცნების სასარგებლოდ ხმების ფალსიფიკაციას ადგილი არ ჰქონია და არსებული შედეგები ხალხის განწყობას ემთხვევა.

ონლაინ მედია

ტელევიზიებისგან განსხვავებით რუსულმა ონლაინ საინფორმაციო სააგენტოებმა საქართველოს არჩევნებს უფრო დიდი ყურადღება დაუთმეს.

პროსახელისუფლებო ახალი ამბების სააგენტო RIA აშუქებდა როგორც პირველი პირების ხმის მიცემის პროცესს, ისე ოპოზიციის პროტესტსა და აქტივისტების დაკავებას. გამოცემა ცალკე მასალას უთმობს ნინო ბურჯანაძის პარტიას და აღნიშნავს, რომ ის პარლამენტში ვერ შედის. ნიუსში ნათქვამია, რომ ბურჯანაძე მოსკოვთან დიალოგის მომხრეა, რომელმაც რუსეთს უწოდა "მეზობელი დიდი გავლენით".

კიდევ ერთი საარჩევნო მასალა ამჯერად ზუგდიდის ბანკის ძარცვაში ბრალდებულ ბადრი ესებუას და მისთვის ხმის მიცემას ეხება. როგორც RIA აღნიშნავს, ერთ-ერთმა მოქალაქემ არც ერთ კანდიდატს არ დაუჭირა მხარი და ბიულეტენში ხელით ბადრი ესებუა ჩაწერა.

საპარლამენტო არჩევნებზე მოვლენათა განვითარებას მიჰყვებოდა სახელმწიფო გამოცემა TASS. მათ ცალკე ამბად გამოყვეს, რომ საპარლამენტო არჩევნების დღეს საქართველოში სისხლის სამართლის 12 საქმე აღიძრა.

პრო-კრემლისტური ტაბლოიდი კომსომოლსკაია პრავდა, რომელიც თავისი ექსცენტრიული სათაურებითაც გამოირჩევა, არჩევნების შემდეგ ესაუბრა საქართველოში რუსეთის საელჩოს ყოფილ პირველ მდივანს, იგორ გვრიტიშვილს. ინტერვიუ იწყება პათოსით, რომ რუსეთისადმი კეთილგანწყობილი პარტიები, საუბარია ნინო ბურჯანაძის ერთიან საქართველოსა და პატრიოტთა ალიანსზე — პარლამენტში ვერ მოხვდნენ.

არჩევნები და შემდგომი პროტესტი გააშუქა Sputnik-Georgia-მ. ქვეყანაში მიმდინარე პოლიტიკურ მდგომარეობაზე, როგორც Sputnik-ში ამბობენ, ესაუბრნენ პარლამენტის ყოფილ წევრს ვახტანგ ხმალაძეს, რონდელის ფონდის ექსპერტს ნოდარ ხარშილაძეს და პოლიტიკის მეცნიერს ლევან მეტრეველს. კიდევ ერთი სტატია გამოქვეყნდა სათაურით "საღამოსთვის ვგეგმავთ რევოლუციას, ან როგორ ირჩევდნენ საქართველოში პარლამენტს", რომელიც გამოცემის კოლუმნისტს ეკუთვნის.

გაზეთები

უნდა აღინიშნოს, რომ რუსულმა სახელისუფლებო მედიებმა ცალკე ნიუსები დაუთმეს იმას, რომ მიხეილ სააკაშვილმა უარი თქვა პრემიერმინისტრის თანამდებობაზე. ბევრი სტატია სწორედ არჩევნებში მის როლს ეხება. მათ შორისაა Moskovsky Komsomolets-ის მასალა: "სააკაშვილმა ვერ შეძლო წარსულის დაბრუნება: ქართული ექსპერიმენტის დასასრული მოვიდა". სხვების მსგავსად, აქაც მასალის ავტორი, რომელიც, სხვათა შორის მითითებული არაა, სააკაშვილის "რევოლუციურ სცენარზე" საუბრობს. თუმცა რა მტკიცებულებებს ეყრდნობა მსგავსი ნააზრევი, მითითებული არაა.

Kommersanti-ის სტატიაში "საქართველოს ხელისუფლება მარტო იოცნებებს" ისიც კი განხილულია, რა შედეგი შეიძლება მოჰყვეს ოპოზიციის პარლამენტში არ შესვლას.

საერთო ჯამში, გაშუქების ტონი და სტატიების დიდი ნაწილი ეხება სწორედ არჩევნებში ქართული ოცნების დამაჯერებელ გამარჯვებას. მასალებში არ მოხვედრილა ფაქტები, გადაცდომებისა და დარღვევების შესახებ. სამაგიეროდ, "გაყალბებაზე ბრალდების წამოყენება" და "რევოლუციის საფრთხე" ოპოზიციას, განსაკუთრებით კი ყოფილ პრეზიდენტს, მიხეილ სააკაშვილს მიეწერება.

ამავე თემაზე:

• ინფოგრაფიკი: ვინ აკეთებს რუსეთის საქმეს საქართველოში?
• რუსული აქტორები ქართულ მედიაში, პოლიტიკასა და საზოგადოებრივ ცხოვრებაში

თუ გინდა, რომ ნამდვილი და ყალბი ამბები ერთმანეთისგან მარტივად განასხვავო და დეზინფორმაციისგან სხვებიც დაიცვა, შემოგვიერთდი ჯგუფში – ერთად ვებრძოლოთ დეზინფორმაციას.

სტატია მოამზადა On.ge-მ აღმოსავლეთ-დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის დამზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. სტატიის შინაარსზე პასუხისმგებელია On.ge. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.