გაეროს გენერალური ასამბლეის 75-ე სესიაზე სიტყვით გამოსვლისას პრემიერმინისტრმა, გიორგი გახარიამ ოკუპაციასა და რუსეთის მხრიდან აგრესიულ ქმედებებზე ისაუბრა. მან ასამბლეაზე საოკუპაციო რეჟიმის მიერ მოკლული გიგა ოთხოზორია, არჩილ ტატუნაშვილი და დავით ბაშარული ახსენა.

" უკანონო სამხედრო წვრთნების, ბორდერიზაციის — მავთულხლართების და სხვა ხელოვნური ბარიერების აღმართვის ფონზე, ოკუპაციის მძიმე ფასის გადახდა, პირველ რიგში, უწევს კონფლიქტით დაზარალებულ მოსახლეობას, რომლებიც ჰუმანიტარულ კრიზისს განიცდიან — დაკარგული აქვთ წვდომა საკუთარ კარ-მიდამოზე; უწევთ ცხოვრება რეალობაში, სადაც გადასასვლელების ჩაკეტვა, ოჯახების კიდევ უფრო დაშორება ყოველდღიურობაა; სადაც მათ წართმეული აქვთ მიმოსვლის თავისუფლება, საკუთრების უფლება, განათლების უფლება, წვდომა ელემენტარულ სამედიცინო სერვისებზე. ადგილი აქვს ადგილობრივების გატაცებას, წამებას და მკვლელობას. აუცილებლად უნდა გაგახსენოთ ჩვენი მოქალაქეების — გიგა ოთხოზორია, არჩილ ტატუნაშვილი და დავით ბაშარულის სახელები, რომლებიც საოკუპაციო რეჟიმის წარმომადგენლებმა სიცოცხლეს გამოასალმეს. საქართველო არასოდეს შეეგუება ოკუპაციას", — აღნიშნა მან.

გახარიამ ხაზი გაუსვა იმასაც, რომ რუსეთი არ ასრულებს 2008 წელს ნაკისრ ვალდებულებებს ცეცხლის შეწყვეტის შესახებ და აგრძელებს საქართველოს ტერიტორიული მთლიანობისა და სუვერენიტეტის, საერთაშორისო სამართლის ფუნდამენტური ნორმებისა და პრინციპების უგულებელყოფას.

გაერთიანებული ერების ორგანიზაცია წელს 75 წლის გახდა და პირველად, მისი არსებობის განმავლობაში, გენერალური ასამბლეა იმართება დისტანციურად.

ამავე თემაზე: