გაერო-ს გენერალური ასამბლეის 75-ე სესიაზე სიტყვით გამოსვლისას, პრემიერმინისტრმა, გიორგი გახარიამ განაცხადა, რომ საქართველოს მთავრობა ყველაფერს გააკეთებს არჩევნების მიუკერძოებელ და გამჭვირვალე გარემოში ჩასატარებლად.

"საქართველოს მთავრობა ყველაფერს აკეთებს და გააკეთებს იმისთვის, რომ ამ უმნიშვნელოვანესმა არჩევნებმა, რომლის ჩატარებაც გვიწევს პანდემიის პირობებში, ჩაიაროს თავისუფალ, მიუკერძოებელ, გამჭვირვალე და დემოკრატიულ გარემოში, სადაც საერთაშორისო დამკვირვებლების მაქსიმალური დასწრების ფონზე, საქართველოს ყველა მოქალაქეს მიეცემა შესაძლებლობა, თავისუფლად გამოხატოს საკუთარი პოლიტიკური ნება", — განაცხადა მან.

2020 წლის საპარლამენტო არჩევნები 120/30 ფორმატით ჩატარდება. პანდემიის გამო არჩევნებს დამკვირვებლების შეზღუდული რაოდენობა დაესწრება. სადამკვირვებლო ორგანიზაციების ნაწილი აპირებს, პროცესს დისტანციურად დააკვირდეს.

სახალხო დამცველის განცხადებით, წინასაარჩევნოდ უკვე დაფიქსირდა ძალისმიერი ანგარიშსწორების ფაქტები, პოლიტიკური ოპონენტების წინააღმდეგ და პირადი ცხოვრების გამოყენებით ადამიანების დაშინებაც ხდება. როგორც ლომჯარიამ აღნიშნა, წინა წლების პრაქტიკა აჩვენებს, რომ საარჩევნოდ გამოვლენილი ძალადობრივი ქმედებების გამო არავინ დასჯილა.

გაერთიანებული ერების ორგანიზაცია წელს 75 წლის გახდა და პირველად, მისი არსებობის განმავლობაში, გენერალური ასამბლეა იმართება დისტანციურად.

გაიგეთ მეტი: